Ózbekstan Prezidenti Shavkat Mirziyoev Ukraina Prezidenti Vladimir Zelenskiydi Ukrainanıń milliy bayramı – Ǵárezsizlik kúni múnásibeti menen qutlıqladı. Bul haqqında Ukraina jetekshisi óziniń X‘taǵı betinde málim etti.

Vladimir Zelenskiy Shavkat Mirziyoevqa minnetdarshılıq bildirgen halda usı qutlıqlaw xatı súwretin járiyalaǵan.
“Ukrainanıń milliy bayramı – Ǵárezsizlik kúni múnásibeti menen sizdi hám pútkil Ukraina xalqın qızǵın qutlıqlayman. Mámleketlerimiz arasındaǵı dástúriy doslıq hám uzaq múddetli birge islesiw principlerine tiykarlanǵan baylanıslar keleshekte de xalıqlarımızdıń ulıwma mápleri jolında rawajlanıp bara beretuǵınına isenemen.
Pursattan paydalanıp, Sizge bekkem densawlıq, shańaraqlıq baxıt-ıǵbal, juwapkershilikli jumısıńızda tabıslar, Ukraina xalqına bolsa tınıshlıq-amanlıq hám abadanlıq tilep qalaman”, delingen Ózbekstan Prezidentiniń qutlıqlaw xatında.
Zelenskiy, óz gezeginde, Ózbekstan hám Ukraina arasında nátiyjeli birge islesiwdi izbe-iz rawajlandırıw hám eki tárepleme qatnasıqlardı dos xalıqlar mápi jolında bekkemlewge isenim bildirgen.
“Men Ukrainanıń aymaqlıq pútinligi máselesindegi Siziń poziciyańızdı hám ukrainalı balalardı Ózbekstanda salamatlandırıwǵa qaratılǵan insanıylıq baslamalarıńızdı joqarı qádirleymen”, dep jazǵan Ukraina Prezidenti.

Qaraqalpaqstan xabar agentligi