“Өзтоқымашылықсанаат” ассоциациясы мәлимлеме хызметиниң мәлим етиўинше, Түркияның Қаҳраманмараш ўәлаятында тоқымашылық тараўы ўәкиллериниң қатнасыўында еки мәмлекет арасында саўда-экономикалық ҳәм инвестициялық бирге ислесиўди раўажландырыўға қаратылған дөгерек сәўбети өткерилди.

Өзбекстанның Түркиядағы елшиханасы ҳәм “Arikan Group” компаниясы менен биргеликте шөлкемлестирилген бул илажға “Kipaş Holding”, “Molcem Nano”, “Elif Iplik” сыяқлы ири түрк тоқымашылық компанияларының ўәкиллери қатнасты.

Додалаўлар даўамында еки мәмлекет кәрханалары арасындағы бирге ислесиў, жаңа инвестициялық жойбарлар ҳәм базар имканиятлары кеңнен көрип шығылды. Атап айтқанда, “Molcem Nano”  компаниясы өндирис процесслериниң бир бөлегин Шыршық технопаркине көширгени, “Elif Iplik” болса Өзбекстанға экспорт ҳәм биргеликтеги жойбарларға қызығыўшылық билдиргени атап өтилди.

Сөйлесиўде атап өтилгениндей, “Arikan Group”  пенен Өзбекстанда биргеликтеги өндирис, илимий-изертлеў жумысын жолға қойыў ҳәм Түркияда маркетинг офислерин ашыў режелестирилмекте. Сондай-ақ, Ташкент тоқымашылық университети менен миллий липаслар дизайнына бағышланған биеннале шөлкемлестириў бойынша келисимге ерисилген.

Илаж жуўмағында тәреплер алдағы режелерге тоқтап өтти. Оған бола, келешектеги бирге ислесиў шеңберинде түрк компаниялары 2025-жыл 9-11-сентябрь күнлери болып өтетуғын “TextileExpo” көргизбеси шеңберинде Өзбекстанға бизнес-миссия менен келиўи белгиленген. Бул сапар етиў өндирис, инновация ҳәм мәдений алмасыў тараўларындағы байланысларды және де беккемлеўге хызмет етеди.

Н.Зиёдуллаева, ӨзА