“Ўзтўқимачиликсаноат” уюшмаси ахборот хизмати маълум қилишича, Туркиянинг Қаҳрамонмараш вилоятида тўқимачилик соҳаси вакиллари иштирокида икки давлат ўртасида савдо-иқтисодий ва инвестициявий ҳамкорликни ривожлантиришга қаратилган давра суҳбати ўтказилди.

Ўзбекистоннинг Туркиядаги элчихонаси ва “Arikan Group” компанияси ҳамкорлигида ташкил этилган ушбу тадбирда “Kipaş Holding”, “Molcem Nano”, “Elif Iplik” каби йирик турк тўқимачилик компаниялари вакиллари иштирок этди.

Муҳокамалар давомида икки давлат корхоналари ўртасидаги мавжуд ҳамкорлик, янги инвестиция лойиҳалари ва бозор имкониятлари кенг кўриб чиқилди. Хусусан, “Molcem Nano” компанияси ишлаб чиқариш жараёнларининг бир қисмини Чирчиқ технопаркига кўчиргани, “Elif Iplik” эса Ўзбекистонга экспорт ва қўшма лойиҳаларга қизиқиш билдиргани таъкидланди.

Мулоқотда таъкидланганидек, “Arikan Group” билан Ўзбекистонда қўшма ишлаб чиқариш, илмий-тадқиқот фаолиятини йўлга қўйиш ва Туркияда маркетинг офисларини очиш режалаштирилмоқда. Қолаверса, Тошкент тўқимачилик университети билан миллий либослар дизайнига бағишланган биеннале ташкил этиш бўйича келишувга эришилган.

Тадбир якунида томонлар келгуси режаларга тўхталиб ўтди. Унга кўра, келгуси ҳамкорлик доирасида турк компаниялари 2025 йил 9-11 сентябрь кунлари бўлиб ўтадиган “TextileExpo” кўргазмаси доирасида Ўзбекистонга бизнес-миссия билан ташриф буюриши белгиланган. Ушбу ташриф ишлаб чиқариш, инновация ва маданий алмашинув соҳаларидаги алоқаларни янада мустаҳкамлашга хизмат қилади.

Н.Зиёдуллаева,

ЎзА