“Аваза” миллий туризм зонасының Конгресс орайында Өзбекстан Республикасы Президенти Шавкат Мирзиёев ҳәм Түркмен халқының миллий жетекшиси, Түркменстан Халық Мәсләҳәти Баслығы Гурбангули Бердимуҳамедовтың жүзбе-жүз ҳәм рәсмий делегациялардың қатнасыўындағы сөйлесиўлери болып өтти.

Сөйлесиў алдынан Түркменстан жетекшиси мәмлекетимиз басшысына Түркменстан Президенти Сердар Бердимуҳамедовтың сәлеми ҳәм ең жақсы тилеклерин жеткерди.

Өзбекстан Президенти мәмлекет басшысы ҳәм туўысқан түркмен халқын усы айдың басында Авазада БМШтың Теңизге шығыў имканияты болмаған раўажланып атырған мәмлекетлер бойынша үшинши конференциясы табыслы өткерилгени менен және бир мәрте қутлықлады.

Жоқары дәрежедеги келисимлерди әмелге асырыў шеңберинде Өзбекстан-Түркменстан дослық, жақсы қоңсышылық ҳәм стратегиялық шериклик қатнасықларын буннан былай да кеңейтиў ҳәм беккемлеўдиң әҳмийетли мәселелери көрип шығылды.

Өз-ара пайдалы бирге ислесиў барлық бағдарларда жедел раўажланып атырғаны үлкен қанаатланыўшылық пенен атап өтилди.

Усы жылдың басынан берли товар алмасыўдың көлеми 700 миллион долларды қурады. Февраль айынан баслап мәмлекетлер арасында еркин саўда режими әмел етпекте, пайтахтларда саўда үйлери ислемекте. Санаат, энергетика, транспорт, аўыл ҳәм суў хожалығы, экономиканың басқа да тармақларында кооперациялық жойбарлар әмелге асырылмақта.

Усы жылы “Шават – Ташаўыз” саўда зонасын иске қосыў бойынша биргеликтеги жумыслар жуўмақланбақта.

Болажақ жоқары дәрежедеги ушырасыўларға таярлық шеңберинде Ҳүкиметлераралық комиссиялар ҳәм Исбилерменлер кеңесиниң мәжилислерин және бир қатар мәдений илажларды нәтийжели өткериў әҳмийетли екенлиги атап өтилди.

Жетекшилер Орайлық Азия мәмлекетлери басшыларының болажақ жетинши Мәсләҳәт ушырасыўының күн тәртиби бойынша да пикир алысты. Усы мәниде, “Әзербайжан – Түркменстан – Өзбекстан” форматындағы сөйлесиўлер айрықша әҳмийетке ийе екени атап өтилди.

ӨзА