“Avaza” milliy turizm zonasınıń Kongress orayında Ózbekstan Respublikası Prezidenti Shavkat Mirziyoev hám Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedovtıń júzbe-júz hám rásmiy delegaciyalardıń qatnasıwındaǵı sóylesiwleri bolıp ótti.

Sóylesiw aldınan Túrkmenstan jetekshisi mámleketimiz basshısına Túrkmenstan Prezidenti Serdar Berdimuhamedovtıń sálemi hám eń jaqsı tileklerin jetkerdi.
Ózbekstan Prezidenti mámleket basshısı hám tuwısqan túrkmen xalqın usı aydıń basında Avazada BMShtıń Teńizge shıǵıw imkaniyatı bolmaǵan rawajlanıp atırǵan mámleketler boyınsha úshinshi konferenciyası tabıslı ótkerilgeni menen jáne bir márte qutlıqladı.
Joqarı dárejedegi kelisimlerdi ámelge asırıw sheńberinde Ózbekstan-Túrkmenstan doslıq, jaqsı qońsıshılıq hám strategiyalıq sheriklik qatnasıqların bunnan bılay da keńeytiw hám bekkemlewdiń áhmiyetli máseleleri kórip shıǵıldı.
Óz-ara paydalı birge islesiw barlıq baǵdarlarda jedel rawajlanıp atırǵanı úlken qanaatlanıwshılıq penen atap ótildi.
Usı jıldıń basınan berli tovar almasıwdıń kólemi 700 million dollardı quradı. Fevral ayınan baslap mámleketler arasında erkin sawda rejimi ámel etpekte, paytaxtlarda sawda úyleri islemekte. Sanaat, energetika, transport, awıl hám suw xojalıǵı, ekonomikanıń basqa da tarmaqlarında kooperaciyalıq joybarlar ámelge asırılmaqta.
Usı jılı “Shavat – Tashawız” sawda zonasın iske qosıw boyınsha birgeliktegi jumıslar juwmaqlanbaqta.
Bolajaq joqarı dárejedegi ushırasıwlarǵa tayarlıq sheńberinde Húkimetleraralıq komissiyalar hám Isbilermenler keńesiniń májilislerin jáne bir qatar mádeniy ilajlardı nátiyjeli ótkeriw áhmiyetli ekenligi atap ótildi.
Jetekshiler Oraylıq Aziya mámleketleri basshılarınıń bolajaq jetinshi Másláhát ushırasıwınıń kún tártibi boyınsha da pikir alıstı. Usı mánide, “Ázerbayjan – Túrkmenstan – Ózbekstan” formatındaǵı sóylesiwler ayrıqsha áhmiyetke iye ekeni atap ótildi.

ÓzA