Европа мәмлекетлери ҳәм Украинаның миллий қәўипсизлик бойынша кеңесгөйлери бүгин АҚШ Мәмлекетлик хаткери, соның менен бирге, АҚШ миллий қәўипсизлик бойынша кеңесгөйи ўазыйпасын да атқарыўшы Марко Рубио менен ушырасып, Украина ушын қәўипсизлик кепилликлерин додалаўды режелестирмекте, деп хабар берди “The New York Times” газетасы.

“Axios” басылымы алдынырақ, Рубио қәўипсизлик кепилликлери бойынша усыныслар ислеп шығыў ушын АҚШ, Европа ҳәм Украина ўәкиллеринен ибарат комиссияны басқаратуғыны ҳаққында жазған еди.

Басылымға бола, АҚШ қәўипсизлик кепилликлери Европа әмелиятларын ҳаўадан қоллап-қуўатлаў ўәдесин ямаса Украинадағы миссияларды қоллап-қуўатлаў ушын Вашингтонның разведка жәрдемин, сондай-ақ, Қара теңизге күшлер жайластырыўды өз ишине алыўы мүмкин.

Буннан тысқары, олар қәўипсизлик кепилликлериниң нызамлы күшин қандай тәмийинлеўди, соның ишинде, АҚШ Конгресси тәрепинен тастыйықланыўы керек пе ямаса жоқ па, деген мәселени де шешиўи күтилмекте.

Бурынырақ, Германия канцлери Фридрих Мерц Вашингтондағы Украина бойынша ушырасыў жуўмақлары бойынша Украина ушын қәўипсизлик кепилликлеринде ким ҳәм қай дәрежеде қатнасыўы мәселеси европалы шериклер ҳәм АҚШ ҳүкимети менен додаланыўы керек екенлигин айтқан еди.

С.Раҳимов, ӨзА