Evropa mámleketleri hám Ukrainanıń milliy qáwipsizlik boyınsha keńesgóyleri búgin AQSh Mámleketlik xatkeri, sonıń menen birge, AQSh milliy qáwipsizlik boyınsha keńesgóyi wazıypasın da atqarıwshı Marko Rubio menen ushırasıp, Ukraina ushın qáwipsizlik kepilliklerin dodalawdı rejelestirmekte, dep xabar berdi “The New York Times” gazetası.

“Axios” basılımı aldınıraq, Rubio qáwipsizlik kepillikleri boyınsha usınıslar islep shıǵıw ushın AQSh, Evropa hám Ukraina wákillerinen ibarat komissiyanı basqaratuǵını haqqında jazǵan edi.
Basılımǵa bola, AQSh qáwipsizlik kepillikleri Evropa ámeliyatların hawadan qollap-quwatlaw wádesin yamasa Ukrainadaǵı missiyalardı qollap-quwatlaw ushın Vashingtonnıń razvedka járdemin, sonday-aq, Qara teńizge kúshler jaylastırıwdı óz ishine alıwı múmkin.
Bunnan tısqarı, olar qáwipsizlik kepillikleriniń nızamlı kúshin qanday támiyinlewdi, sonıń ishinde, AQSh Kongressi tárepinen tastıyıqlanıwı kerek pe yamasa joq pa, degen máseleni de sheshiwi kútilmekte.
Burınıraq, Germaniya kancleri Fridrix Merc Vashingtondaǵı Ukraina boyınsha ushırasıw juwmaqları boyınsha Ukraina ushın qáwipsizlik kepilliklerinde kim hám qay dárejede qatnasıwı máselesi evropalı sherikler hám AQSh húkimeti menen dodalanıwı kerek ekenligin aytqan edi.

S.Rahimov, ÓzA