Ташкентте “Орайлық Азия – исеним, қәўипсизлик ҳәм турақлы раўажланыўдың улыўма мәканы” VIII Орайлық Азия экспертлер форумы (ОАЭФ) өз жумысын даўам еттирмекте. Бүгин, Өзбекстан Республикасы Президенти жанындағы Стратегиялық ҳәм регионлараралық изертлеўлер институты (СРИИ) тәрепинен шөлкемлестирилген әнжуманның екинши күни илажлары “Орайлық Азияда регионаллық өзине тәнликти қәлиплестириўдиң әмелий тәреплери” атамасындағы илимий-әмелий конференция менен басланды.

Бул илаж Өзбекстан Республикасы Президенти Шавкат Мирзиёевтиң регионаллық өзине тәнликти қәлиплестириўге байланыслы әмелий тәреплерге бағышланған Форум өткериў басламасының әмелий көриниси болып есапланады.

СРИИ директорының биринши орынбасары Акрамжон Неъматов усы халықаралық экспертлер сөйлесиўин ашып берип, дүньяда идеологиялық гүрес ҳәўиж алған, атап айтқанда, түрли цивилизациялар, мәдениятлар ҳәм динлердиң соқлығысыўы бақланып атырған шараятта, мәдений-цивилизациялық улыўмалықты беккемлеў бузғыншы сыртқы тәсирге қарсы турыў ҳәм регионның мәдений-цивилизациялық өзине тәнлигин ҳәм бирлигин, әсиресе, билимлендириў тараўында ҳәм жаслар арасында сақлап қалыўдың әҳмийетли факторы екенин атап өтти.

Буннан соң тығыз бирге ислесиўшилер – Қырғызстанның “Геосиёсат ва стратегия” илимий-изертлеў институтының директоры Канатбек Азиз, Қазақстандағы Р.Сулайманов атындағы шығыстаныў институтының илимий хызметкери Еркин Байдаров, қоңсы Тәжикстаннан келген белгили эксперт Шерали Ризоён ҳәм Түркменстан Сыртқы ислер министрлиги жанындағы Халықаралық қатнасықлар институтының стратегиялық изертлеўлер орайының хызметкери Бекдурди Амансариев те қутлықлаў сөзи менен шығып, әнжуман жумысына табыс тиледи.

Улыўма, қатнасыўшылар бул сөйлесиў регионаллық тилеклеслик сезимин және де күшейтип, Орайлық Азияда “төменнен жоқарыға интеграция” принципи тийкарында бирге ислесиўди раўажландырыў имканиятын беретуғынын атап өтти.

ӨзА