Tashkentte “Oraylıq Aziya – isenim, qáwipsizlik hám turaqlı rawajlanıwdıń ulıwma mákanı” VIII Oraylıq Aziya ekspertler forumı (OAEF) óz jumısın dawam ettirmekte. Búgin, Ózbekstan Respublikası Prezidenti janındaǵı Strategiyalıq hám regionlararalıq izertlewler institutı (SRII) tárepinen shólkemlestirilgen ánjumannıń ekinshi kúni ilajları “Oraylıq Aziyada regionallıq ózine tánlikti qáliplestiriwdiń ámeliy tárepleri” atamasındaǵı ilimiy-ámeliy konferenciya menen baslandı.
Bul ilaj Ózbekstan Respublikası Prezidenti Shavkat Mirziyoevtiń regionallıq ózine tánlikti qáliplestiriwge baylanıslı ámeliy táreplerge baǵıshlanǵan Forum ótkeriw baslamasınıń ámeliy kórinisi bolıp esaplanadı.

SRII direktorınıń birinshi orınbasarı Akramjon Nematov usı xalıqaralıq ekspertler sóylesiwin ashıp berip, dúnyada ideologiyalıq gúres háwij alǵan, atap aytqanda, túrli civilizaciyalar, mádeniyatlar hám dinlerdiń soqlıǵısıwı baqlanıp atırǵan sharayatta, mádeniy-civilizaciyalıq ulıwmalıqtı bekkemlew buzǵınshı sırtqı tásirge qarsı turıw hám regionnıń mádeniy-civilizaciyalıq ózine tánligin hám birligin, ásirese, bilimlendiriw tarawında hám jaslar arasında saqlap qalıwdıń áhmiyetli faktorı ekenin atap ótti.
Bunnan soń tıǵız birge islesiwshiler – Qırǵızstannıń “Geosiyosat va strategiya” ilimiy-izertlew institutınıń direktorı Kanatbek Aziz, Qazaqstandaǵı R.Sulaymanov atındaǵı shıǵıstanıw institutınıń ilimiy xızmetkeri Erkin Baydarov, qońsı Tájikstannan kelgen belgili ekspert Sherali Rizoyon hám Túrkmenstan Sırtqı isler ministrligi janındaǵı Xalıqaralıq qatnasıqlar institutınıń strategiyalıq izertlewler orayınıń xızmetkeri Bekdurdi Amansariev te qutlıqlaw sózi menen shıǵıp, ánjuman jumısına tabıs tiledi.
Ulıwma, qatnasıwshılar bul sóylesiw regionallıq tilekleslik sezimin jáne de kúsheytip, Oraylıq Aziyada “tómennen joqarıǵa integraciya” principi tiykarında birge islesiwdi rawajlandırıw imkaniyatın beretuǵının atap ótti.

ÓzA