Алдын хабар бергенимиздей, республикамызда зыянлы организмлерге қарсы өз ўақтында нәтийжели гүресиў илажларын шөлкемлестириў ҳәм фитосанитариялық қәўипсизликти тәмийинлеў мақсетинде 2025-жыл 7-июльден 7-августқа шекем “Әҳмийетли отыз күнлик” жәрияланып, бул бағдардағы жумыслар Тақыятас районында да даўам етпекте.

Өсимликлер карантини ҳәм қорғаў агентлигиниң Тақыятас районлық бөлими инспекторлары тәрепинен райондағы фермер хожалықларының бағ ҳәм атыз майданларында фитосанитариялық мониторинг өткерилип, өнимлерден үлгилер алынды ҳәм агентликтиң көшпели лабораториясында тексериўден өткерилди.

Фитосанитариялық атыз қадағалаўын әмелге асырыў даўамында анықланған зыянлы организмлерге өз ўақтында қарсы гүресиў жумысларын алып бармаған юридикалық ҳәм физикалық шахсларға қарсы нызамға муўапық шара көриў белгилеп қойылған.

Илаж шеңберинде агентлик қәнигелери тәрепинен егинлерде ушырасыўы мүмкин болған зыянкес ҳәм кеселликлерге қарсы гүресиў бойынша үгит-нәсият жумыслары алып барылып, зыянсызландырыў илажларын әмелге асырыў бойынша усыныслар берилди.

Агентлик инспекторлары тәрепинен карантин астындағы объектлердиң тарқалыўының алдын алыў ушын бағшылық ҳәм дийқаншылық хожалықларында, жеке қыйтақ жер, кәрхана, шөлкем, үлкен жол бойлары ҳәм басқа да майданларда карантин илажлары нәтийжели даўам етпекте.

Қарақалпақстан хабар агентлиги.