Аввал хабар берганимиздек, республикамизда зарарли организмларга қарши ўз вақтида самарали курашиш чораларини ташкил этиш ва фитосанитар хавфсизликни таъминлаш мақсадида 2025 йил 7 июлдан 7 августгача «Долзарб ўттиз кунлик» эълон қилиниб, бу борадаги ишлар Тахиатош туманида ҳам давом этмоқда.

Ўсимликлар карантини ва ҳимояси агентлигининг Тахиатош тумани бўлими инспекторлари томонидан тумандаги фермер хўжаликларининг боғ ва дала майдонларида фитосанитар мониторинг ўтказилиб, маҳсулотлардан намуналар олинди ва агентликнинг кўчма лабораториясида текширувдан ўтказилди.

Фитосанитар дала назоратини амалга ошириш давомида аниқланган зарарли организмларга қарши ўз вақтида курашиш ишларини олиб бормаган юридик ва жисмоний шахсларга нисбатан қонунга мувофиқ чора кўриш белгилаб қўйилган.

Тадбир доирасида агентлик мутахассислари томонидан экинларда учраши мумкин бўлган зараркунанда ва касалликларга қарши курашиш бўйича тарғибот ишлари олиб борилиб, зарарсизлантириш тадбирларини амалга ошириш бўйича тавсиялар берилди.

Агентлик инспекторлари томонидан карантин остидаги объектлар тарқалишининг олдини олиш учун боғдорчилик ва деҳқончилик хўжаликларида, шахсий томорқа, корхона, ташкилот, катта йўл бўйлари ва бошқа майдонларда карантин тадбирлари самарали давом этмоқда.

Қорақалпоғистон ахборот агентлиги.