Денсаўлықты сақлаў тараўында халықаралық тәжирийбелер менен танысыў, бул бағдарда алдынғы тәжирийбелерди үйрениў, енгизиў, халқымыздың абаданлығы жолында бирге ислесиў бәрқулла үлкен әҳмийетке ийе болып келмекте.

Қарақалпақстан Республикасы Денсаўлықты сақлаў министрлиги тәрепинен медицина тараўында бул бағдарда халықаралық бирге ислесиўлерди жолға қойыў ҳәм сырт ел тәжирийбесин елимизге алып кириў бойынша бир қатар унамлы илажлар әмелге асырылмақта.

Қарақалпақстан Республикасы Денсаўлықты сақлаў министрлигиниң басламасы менен бир қатар мәмлекетлердеги дүньяға белгили медицина мәкемелери, шөлкемлери менен бирге ислесиўлер жолға қойылып, дүзилген Меморандумларға тийкарланып көплеген әмелий илажлар, бийпул операциялар, медициналық жәрдемлер әмелге асырылмақта.

Усындай халықаралық бирге ислесиўлер нәтийжесинде АҚШтың “PROJECT C.U.R.E.” шөлкеминиң 6-санлы гуманитарлық жәрдем контейнери Қарақалпақстанға жетип келди.

– Әлбетте, бундай халықаралық бирге ислесиўлер елимизде медицина тараўын буннан былай да раўажландырыў ҳәм сапалы медициналық хызмет түриниң заман талапларына сай болыўына мүмкиншилик жаратпақта,-дейди министрликтиң инвестицияларды тартыў ҳәм мәмлекетлик-жеке меншик шериклик ҳәм аутсорсингти раўажландырыў секторының бас қәнигеси З.Палўаниязова.

“PROJECT C.U.R.E.” шөлкеминиң ўәкиллери Анне ханым ҳәм Даве мырзалар усы гуманитарлық жәрдем шеңберинде Қарақалпақстанда болып, медициналық мәкемелердеги наўқасларға жаратылған шараятлар менен танысып шықты ҳәм өз пикир-усынысларын билдирип өтти. Гуманитарлық жәрдем контейнерлери медицина мәкемелерине тарқатылды.

Ә.Жийемуратов,

Қарақалпақстан хабар агентлиги.