Усы жылдың 16-19-июль күнлери Өзбекстан ишки ислер министри Азиз Тошпўлатов басшылығындағы делегация рәсмий сапар менен Венгрияда болды.

Сапар даўамында елимиз ўәкиллери Венгрия ишки ислер министри Шандор Пинтер менен сөйлесиўлер өткерди. Тәреплер ишки ҳәм санлы қәўипсизликти тәмийинлеў, жынаятшылық, кибер қәўип-қәтерлерге қарсы гүресиў, сондай-ақ, кадрлар таярлаў сыяқлы перспективалы тараўларда бирге ислесиўди беккемлеў өз-ара пайдалы екенин тастыйықлады.

Сондай-ақ, ушырасыў даўамында терроризм, нәшебентлик затлардың нызамсыз айланысы, миграция процесслерин тәртипке салыў ҳәм пуқаралардың ҳуқықларын қорғаў мәселелерине де айрықша итибар қаратылды.

Венгрия тәрепи Өзбекстан пуқараларына тәмийинленген қәўипсизлик дәрежесине унамлы баҳа берип, шерикликти буннан былай да раўажландырыўға таяр екенин билдирди.

Анық жойбарлар ҳәм әҳмийетли бағдарлар бойынша илажларды әмелге асырыўды нәзерде тутатуғын 2025-2026-жылларға мөлшерленген еки тәреплеме бирге ислесиў “Жол картасы”на қол қойылды. Сөйлесиў ўақтында министр А.Тошпўлатов венгриялы кәсиплесин Өзбекстанға мирәт етти.

Улыўма алғанда, бул ўақыя Өзбекстан ҳәм Венгрия арасында ишки қәўипсизлик ҳәм жәмийетлик тәртипти тәмийинлеў және стратегиялық бирге ислесиўди беккемлеў жолында әҳмийетли қәдем болды, деп айтыў мүмкин.

А.Алимова таярлады, ӨзА