Халықаралық гүрес ассоциациясы календарындағы әҳмийетли илажлардан бири – Өзбекстан Республикасы Президенти сыйлығы ушын халықаралық турнирге санаўлы күнлер қалмақта.

Усы жылдың 21-23-июль күнлери Франция пайтахты Париж қаласында миллий спортымыз гүрес бойынша Өзбекстан Республикасы Президенти сыйлығы ушын халықаралық турнир болып өтеди.

Дүнья мәденияты ҳәм көркем өнериниң бесиги есапланатуғын Париж қаласындағы Эйфел минарасы жанында шөлкемлестирилетуғын бул абырайлы жарыста 20 дан аслам мәмлекеттен 100 ге шамалас ең күшли гүресшилер қатнасыў ушын арзалар тапсырған.

Бул абырайлы турнирде ўәкиллеримизден бир неше мәрте жәҳән ҳәм континент чемпионлығына ерискен, Азия ойынларының жеңимпазы Муҳсин Ҳисомиддинов, Шерали Жўраев, Атабек Тўрабоев сыяқлы тәжирийбели спортшыларымыз бенен бир қатарда, жас гүресшилер де гилемге шығыўға таярлық көрмекте.

Бүгин, 21-июль күни жарыс алдынан төрешилер, техникалық комиссия ҳәм шөлкемлестириў комитетиниң мәжилислери өткерилмекте.

Ертең, 22-июль күни турнир бағдарламасына муўапық, Париждиң дәл ортасында спорт ҳәм мәденият байрамы шөлкемлестирилип, онда өзбек көркем өнери, өнерментшилиги ҳәм миллий тағамлары, тартымлы қосық-намалар кең жәмийетшиликке көрсетиледи.

Күн даўамында гүрес бойынша сыйлық қоры 30 мың евродан ибарат Өзбекстан Республикасы Президенти сыйлығы ушын беллесиўлер болып өтеди.

ӨзА