Ганьсу провинциясы Ланжоу қаласында болып өткен 31-Қытай инвестиция ҳәм саўда ярмаркасында Өзбекстан миллий өнимлери көрсетилди.

50 мәмлекет ҳәм Қытайдың 28 провинциясынан бизнес ассоциациялары, халықаралық шөлкемлер жыйналған ярмаркаға 4000 нан аслам кәрхана, 40 000 ға шамалас ўәкил қатнасты.

Мәмлекетимиздиң павильонынан елимиздиң экспорт ҳәм туристлик потенциалын сәўлелендиретуғын өнерментшилик, ағашқа нағыс ойыў, жипек ҳәм гүлалшылық, гилем, тоқымашылық өнимлери, сондай-ақ, халық әмелий көркем өнери үлгилери орын алған.

Жергиликли мийманларға республикамыздың экспорт ҳәм туристлик имканияты ҳаққында қытай тилинде мағлыўмат берилип, әййемги қалаларымыздың мәденияты ҳаққында сөз етиўши видеокөринислер қойып берилмекте.

Бул көргизбеге қатнасыў өнерментлеримиздиң өнимин Қытай базарына және де көбирек шығарыў имканиятын береди. Итибарлы тәрепи, оғада көп сырт елли исбилерменлер Өзбекстан менен бирге ислесиўге айрықша қызығыўшылық билдирмекте.

Қытайдың ҳәр қыйлы аймақларында мәмлекетимиздиң бай тарийхы ҳәм мәдениятының усынылыўы, экспорт өнимлеримиздиң көрсетилиўи Өзбекстан товарларының Шын базарына кең көлемде барыўына, жергиликли тутыныўшылардың исенимине ерисиўине хызмет етип атырғанын атап өтиў керек.

ӨзА