“Fitch Ratings” халықаралық рейтинг агентлиги тәрепинен “Өзбекнефтьгаз” АЖның кредит рейтинги “ВВ-” дәрежесинен “ВВ” дәрежесине көтерилди. Бул ҳаққында усы шөлкемниң мәлимлеме хызмети хабар берди.

Бул қарар 2025-жыл 26-июнь күни Өзбекстан Республикасының суверен кредит рейтинги “ВВ” дәрежесине көтерилип, прогноз “Турақлы” деп белгиленгеннен соң қабыл етилди.

Рейтингтиң көтерилиўи компанияға мәмлекет тәрепинен көрсетилип атырған беккем ҳәм системалы қоллап-қуўатлаў, сондай-ақ, оның мәмлекет экономикасында тутқан әҳмийетли орнын және бир мәрте тастыйықлайды.

“Өзбекнефтьгаз” АЖ толық мәмлекет мүлкинде болып, оның жумысы тиккелей мәмлекетлик қадағалаўда әмелге асырылады. Соның менен бирге, газ баҳалары мәмлекет тәрепинен тәртипке салынады, компания мәмлекетлик кепилликлер, салық жеңилликлери ҳәм басқа түрдеги экономикалық жәрдем илажлары менен тәмийинленген.

Буннан тысқары, “Fitch Ratings” агентлиги “Өзбекнефтьгаз” АЖның Өзбекстан экономикасындағы стратегиялық әҳмийети ҳәм мәмлекеттиң энергетикалық қәўипсизлигин тәмийинлеўдеги шешиўши ролин де инабатқа алған.

Бундай унамлы рейтинг өзгериўи компанияның халықаралық көлемдеги финанслық турақлылығын ҳәм мәмлекет тәрепинен көрсетилип атырған исенимли қоллап-қуўатлаўды көрсетеди.

Н.Зиёдуллаева таярлады,

ӨзА