“Fitch Ratings” халқаро рейтинг агентлиги томонидан “Ўзбекнефтгаз” АЖнинг кредит рейтинги “BB-” даражасидан “BB” даражасига кўтарилди. Бу ҳақда мазкур ташкилот ахборот хизмати хабар берди.

Мазкур қарор 2025 йил 26 июнь куни Ўзбекистон Республикасининг суверен кредит рейтинги “BB” даражасига кўтарилиб, прогноз “Барқарор” деб белгиланганидан сўнг қабул қилинди.

Рейтингнинг оширилиши компанияга давлат томонидан кўрсатилаётган мустаҳкам ва тизимли қўллаб-қувватлаш, шунингдек, унинг мамлакат иқтисодиётида тутган муҳим ўрнини яна бир бор тасдиқлайди.

Таъкидлаш жоизки, “Ўзбекнефтгаз” АЖ тўлиқ давлат мулкида бўлиб, унинг фаолияти тўғридан-тўғри давлат назоратида амалга оширилади. Шу билан бирга, газ нархлари давлат томонидан тартибга солинади, компания давлат кафолатлари, солиқ имтиёзлари ва бошқа турдаги иқтисодий ёрдам чоралари билан таъминланган.

Бундан ташқари, “Fitch Ratings” агентлиги “Ўзбекнефтгаз” АЖнинг Ўзбекистон иқтисодиётидаги стратегик аҳамияти ва мамлакатнинг энергетик хавфсизлигини таъминлашдаги ҳал қилувчи ролини ҳам инобатга олган.

Бу каби ижобий рейтинг ўзгариши компаниянинг халқаро миқёсдаги молиявий барқарорлиги ва давлат томонидан кўрсатилаётган ишончли қўллаб-қувватлашни намоён этади.

Н.Зиёдуллаева тайёрлади,

ЎзА