Қәнигелестирилген мектеплерде де анық пәнлерден кириў имтиханлары болып өтпекте. Бул процесслер Билим ҳәм көнликпелерди баҳалаў агентлигиниң Қарақалпақстан Республикасы бөлими, Қарақалпақ мәмлекетлик университетиниң спорт сарайы, Нөкис қаласы, 1-санлы қәнигелестирилген мектеп-интернаттың спорт залы ҳәм Нөкис қаласындағы 2-санлы қәнигелестирилген мектеп-интернаттың спорт залында болып өтпекте.

Бул басқышта Қарақалпақстан Республикасынан жәми 10 мың 100 оқыўшы дизимнен өткен. Ата-аналар ушын тест процесслерин онлайн бақлаў имканияты жаратылған. Кириў имтиханы сораўларын шешиў ушын жәми 105 минут ўақыт ажыратылды.

Оқыўшылардың ҳәр бири қәлем, ручка, өширгиш ҳәм ишимлик суўы менен тәмийинленген болып, имтиханды орынлаў ушын барлық қолайлы шараятлар жаратылған. Сондай-ақ, кириў имтиханларына Миллий гвардия, Ишки ислер ҳәм Денсаўлықты сақлаў хызметкерлери де тартылып, олар жәмийетлик тәртипти сақлаў, қатнасыўшылардың денсаўлығы менен байланыслы жағдайларда бийғәрез жәрдем бермекте.

Қәнигелестирилген билимлендириў мәкемелери агентлиги системасындағы мектеплерге кириў имтиханлары 12-июль күнине шекем даўам етеди.

ӨзА