Өзбекстан Республикасы Президенти Шавкат Мирзиёев Монголия Президенти Ухнагийн Хурэлсухтиң мирәт етиўине бола 24-25-июнь күнлери мәмлекетлик сапар менен усы мәмлекетте болды.

Тарийхтағы биринши болған бул сапар етиў Өзбекстан-Монголия қатнасықларында жаңа басқышты баслап берди ҳәм көп тәреплемели бирге ислесиў раўажланыўы ушын кең имканиятлар ашты.

Мәмлекетимиз басшысы кеше Улан-Батор қаласында Президент Ухнаагийн Хурэлсух пенен тар шеңберде ҳәм кеңейтилген қурамда сөйлесиў өткерди. Әмелий бирге ислесиўдиң перспективалы бағдарлары, бәринен бурын, саўда-экономикалық ҳәм санаат тараўларында кооперацияны раўажландырыў мәселелери көрип шығылды.

Жоқары дәрежедеги сөйлесиўлер жуўмағында Өзбекстан Республикасы Президенти Шавкат  Мирзиёев ҳәм Монголия Президенти Ухнаагийн Хурэлсух Кең көлемли шериклик қатнасықларын орнатыў ҳаққындағы биргеликтеги декларацияға қол қойылды.

Сондай-ақ, Президентлердиң қатнасыўында төмендеги ҳүжжетлерге қол қойылды:

-өсимликлер  карантини ҳәм қорғалыўы, жоқары билимлендириў, таў-кән санааты, қоршаған орталықты қорғаў, жынаятшылықтың алдын алыў ҳәм оған қарсы гүресиў, денсаўлықты сақлаў ҳәм медицина илими, денетәрбия ҳәм спорт тараўларында бирге ислесиў ҳаққындағы келисимлер;

-еки мәмлекет архив уйымлары арасындағы бирге ислесиў ҳаққында баянат;

-Өзбекстан Республикасы Инвестициялар, санаат ҳәм саўда министрлиги менен Монголия  Экономика ҳәм раўажланыў министрлиги арасында, сыртқы  ислер  министрликлери арасында 2026-2027-жылларға мөлшерленген, Өзбекстан Республикасы Мәденият  министрлиги менен Монголия Мәденият, спорт, туризм ҳәм жаслар министрлиги арасында 2025-2028-жылларға мөлшерленген бирге ислесиў бағдарламалары;

– Өзбекстан Республикасы Аўыл хожалығы министрлиги ҳәм Монголия Азық-аўқат, аўыл хожалығы ҳәм жеңил санаат министрлиги арасында аўыл хожалығы тараўындағы бирге ислесиўди кеңейтиў бойынша бирге ислесиў режеси;

– Өзбекстан  Республикасы Экология, қоршаған-орталықты қорғаў ҳәм климат өзгериўи министрлиги менен Монголия Мәденият, спорт, туризм ҳәм жаслар министрлиги арасында экотуризм тараўындағы ҳәрекетлер режеси.

Бул әҳмийетли ҳүжжетлер  өз-ара қатнасықладың жаңа басқышында еки ел ушын перспективалы ҳәм үлкен әҳмийетке ийе өз-ара пайдалы қатнасықлар басланғанын тастыйықлайды.

Еки мәмлекет арасындағы бирге ислесиў стратегиялық мәплерге терең ҳүрмет ҳәм тарийхый-мәдений жаңалыққа тийкарланғанын атап өтиў зәрүр. Улыўма, кең көлемли шериклик мәңги дослық қатнасығын беккемлеп, бирге ислесиў тарийхында жаңа бет ашатуғыны сөзсиз.

Президентлер өмирлик жолдаслары менен еки мәмлекет көркем өнер шеберлериниң биргеликтеги концертинде қатнасты.

Сапардың екинши күни Өзбекстан Республикасы Президенти Шавкат Мирзиёев ҳәм Монголия  Президенти Ухнаагийн Хурэлсух өмирлик жолдаслары менен “Их Тэнгэр” комплексине барды. Президентлер ҳәм биринши ханымлар биргеликте терек екти.

Мәресим  еки мәмлекет халықлары арасындағы дослық барған сайын беккемленип атырғаны, Өзбекстан – Монголия кең көлемли шериклик қатнасықларының раўажланыўында жаңа басқыш басланғанының символы болды.

Сапар даўамында жоқары мәртебели  мийманлар «Наадам» дәстүрий монгол беллесиўлерин тамаша етти.

Монголияға биринши сапар еки мәмлекет арасындағы дослық ҳәм көп тәреплемели бирге ислесиў қатнасықларының раўажланыўында тарийхый ўақыя болды.

Соның менен Өзбестан Республикасы Президенти Шавкат Мирзиёевтиң Монголияға мәмлекетлик сапары жуўмақланды.

ӨзА