Кейинги жыллары сырт мәмлекетлерде “Өзбекстан мәденияты күнлери”н өткериў дәстүрге айланды. Бул болса мәмлекетлер арасындағы мәдений, социаллық-гуманитарлық байланыслардың барған сайын раўажланыўында үлкен әҳмийетке ийе.

Мәденият министрлиги мәлимлеме хызметиниң хабарына бола, бул илаж шеңберинде Өзбекстан тарийхы ҳәм мәдениятын сәўлелендириўши көргизбе шөлкемлестирилди. Көргизбеге келгенлер Өзбекстан ҳәм Монголия – бай тарийх ҳәм мәдениятқа ийе мәмлекетлер екенин атап өтти.

– Бизлерди уллы тарийхый шахслар, Уллы Жипек жолы, көшпели ҳәм отырықшы цивилизациялар ҳәм мәдений мийрасқа болған ҳүрмет бирлестиреди, – деди Өзбекстан Республикасы мәденият министри Озодбек Назарбеков. – Уллы Жипек жолы тек ғана экономикалық емес, ал мәдений алмасыў ушын да әҳмийетли жол болған. Ол халықларымызды жақынластырды, мәдений тәжирийбе алмасыўға имканият жаратты.

Сондай-ақ, Өзбекстан мәденият министри Озодбек Назарбеков ҳәм Монголия мәденият, спорт, туризм ҳәм жаслар министри Ундрам Чинбат арасында бирге ислесиў ушырасыўы болып өтти.

Ушырасыўда Монголияда “Өзбекстан мәденияты күнлери” өткерилиўи сыяқлы әҳмийетли ўақыя еки мәмлекет басшыларының дослық ҳәм тығыз бирге ислесиўиниң нәтийжеси екени айрықша атап өтилди.

Өзбекстан мәденият министри Озодбек Назарбеков ушырасыў даўамында бул жарқын илаж мәдений байланысларды беккемлеў, халықларымыз арасындағы өз-ара түсинисиўди тереңлестириў жолында үлкен әҳмийетке ийе екенин атап өтти.

Монголия Миллий опера ҳәм балет театрында “Өзбекстан мәденияты күнлери” шеңберинде өзбекстанлы көркем өнер шеберлериниң қатнасыўында гала-концерт бағдарламасы болып өтти.

2024-жылдың июнь айында пайтахтымызда Өзбекстан ҳәм Монголия көркем өнер шеберлериниң қатнасыўында биргеликтеги концерт бағдарламасы болып өткен еди.

Гала-концерт бағдарламасы даўамында өзбек миллий аяқ ойынлары, намалары, мақам ҳәм опера көркем өнериниң жарқын үлгилери атқарылды.

Н.Усмонова, ӨзА