Keyingi jılları sırt mámleketlerde “Ózbekstan mádeniyatı kúnleri”n ótkeriw dástúrge aylandı. Bul bolsa mámleketler arasındaǵı mádeniy, sociallıq-gumanitarlıq baylanıslardıń barǵan sayın rawajlanıwında úlken áhmiyetke iye.

Mádeniyat ministrligi málimleme xızmetiniń xabarına bola, bul ilaj sheńberinde Ózbekstan tariyxı hám mádeniyatın sáwlelendiriwshi kórgizbe shólkemlestirildi. Kórgizbege kelgenler Ózbekstan hám Mongoliya – bay tariyx hám mádeniyatqa iye mámleketler ekenin atap ótti.
– Bizlerdi ullı tariyxıy shaxslar, Ullı Jipek jolı, kóshpeli hám otırıqshı civilizaciyalar hám mádeniy miyrasqa bolǵan húrmet birlestiredi, – dedi Ózbekstan Respublikası mádeniyat ministri Ozodbek Nazarbekov. – Ullı Jipek jolı tek ǵana ekonomikalıq emes, al mádeniy almasıw ushın da áhmiyetli jol bolǵan. Ol xalıqlarımızdı jaqınlastırdı, mádeniy tájiriybe almasıwǵa imkaniyat jarattı.
Sonday-aq, Ózbekstan mádeniyat ministri Ozodbek Nazarbekov hám Mongoliya mádeniyat, sport, turizm hám jaslar ministri Undram CHinbat arasında birge islesiw ushırasıwı bolıp ótti.
Ushırasıwda Mongoliyada “Ózbekstan mádeniyatı kúnleri” ótkeriliwi sıyaqlı áhmiyetli waqıya eki mámleket basshılarınıń doslıq hám tıǵız birge islesiwiniń nátiyjesi ekeni ayrıqsha atap ótildi.
Ózbekstan mádeniyat ministri Ozodbek Nazarbekov ushırasıw dawamında bul jarqın ilaj mádeniy baylanıslardı bekkemlew, xalıqlarımız arasındaǵı óz-ara túsinisiwdi tereńlestiriw jolında úlken áhmiyetke iye ekenin atap ótti.
Mongoliya Milliy opera hám balet teatrında “Ózbekstan mádeniyatı kúnleri” sheńberinde ózbekstanlı kórkem óner sheberleriniń qatnasıwında gala-koncert baǵdarlaması bolıp ótti.
2024-jıldıń iyun ayında paytaxtımızda Ózbekstan hám Mongoliya kórkem óner sheberleriniń qatnasıwında birgeliktegi koncert baǵdarlaması bolıp ótken edi.
Gala-koncert baǵdarlaması dawamında ózbek milliy ayaq oyınları, namaları, maqam hám opera kórkem óneriniń jarqın úlgileri atqarıldı.

N.Usmonova, ÓzA