“Глобус” жойбарында мәмлекетимиздиң Әзербайжандағы Айрықша ҳәм толық ҳуқықлы елшиси Баҳром Ашрафхоновтың пикирлери усынылады.

Топланған тәжирийбе тийкарында Әзербайжанда автомобиль қурылысы тараўында биргеликтеги жойбарлар табыслы әмелге асырылмақта, тоқымашылық ҳәм пиллешилик кластерлери шөлкемлестирилмекте. Өзбекстанда болса еки тәреплеме бирге ислесиў шеңберинде гипсокартон ҳәм зергерлик буйымларын ислеп шығарыў жолға қойылған.

Кейинги бес жылда еллеримиз арасында товар алмасыўдың баҳасы үш есеге артып, 255 миллион долларға жетти. Мақсет – бул көрсеткишти бир миллиард долларға шығарыў.

Өткен жылы Ташкент ҳәм Баку бирге ислесиўдиң 20 бағдары бойынша келисип алды. Соның ишинде, биргеликте “жасыл” энергия ислеп шығарыў ҳәм Әзербайжан арқалы Европаға экспорт етиў.

Буннан тысқары, экономикалық раўажланыўдың стратегиялық факторы сыпатында көрилетуғын транспорт-логистика коридорларын раўажландырыў күн тәртибинен турақлы орын ийелеген.

Өткен жылы август айында мәмлекет басшылары тәрепинен қол қойылған Аўқамласлық қатнасықлары ҳаққындағы шәртнама Өзбекстан ҳәм Әзербайжан шериклигин буннан былай да беккемлеўде шешиўши әҳмийетке ийе. Тарийхый характерге ийе бул ҳүжжет тек ғана Қубла Кавказ ҳәм Орайлық Азияда емес, ал пүткил Евроазиядағы процесслерге тәсир көрсететуғын мәмлекетлераралық бирге ислесиўдиң жаңа басқышын сәўлелендиреди.

Мәмлекетлеримиз БМШ, Қосылмаў ҳәрекети, Түркий мәмлекетлер шөлкеми, ҒМДА, ЭБШ (Экономикалық бирге ислесиў шөлкеми) сыяқлы абырайлы халықаралық структураларда бир-бирин белсене қоллап-қуўатламақта. Кейинги үш жыл ишинде мәмлекет басшылары өз-ара бес мәрте сапар әмелге асырғаны сиясий сөйлесиўдиң мисли көрилмеген жеделлигинен дәрек береди.

Өзбекстан ҳәм Әзербайжан тәрепинен Экономикалық бирге ислесиў жылы деп жәрияланған 2025-жыл еки тәреплеме дипломатиялық қатнасық орнатылғанының 30 жыллығы белгиленбекте. Бул тарийхый сәне мүнәсибети менен көплеген илажлар, соның ишинде, жоқары дәрежедеги сапарлар ҳәм басқа да әҳмийетли басламалар таярланбақта. Әсиресе, гуманитарлық байланысларды беккемлеўге айрықша әҳмийет беремиз. Мәселен, еки мәмлекетте де уллы шайыр Низамий Ганжаўий туўылғанының 880 жыллығы кеңнен белгиленеди.

Муҳаррама Пирматова тайёрлади,  ӨзА