“Globus” joybarında mámleketimizdiń Ázerbayjandaǵı Ayrıqsha hám tolıq huqıqlı elshisi Bahrom Ashrafxonovtıń pikirleri usınıladı.

Toplanǵan tájiriybe tiykarında Ázerbayjanda avtomobil qurılısı tarawında birgeliktegi joybarlar tabıslı ámelge asırılmaqta, toqımashılıq hám pilleshilik klasterleri shólkemlestirilmekte. Ózbekstanda bolsa eki tárepleme birge islesiw sheńberinde gipsokarton hám zergerlik buyımların islep shıǵarıw jolǵa qoyılǵan.
Keyingi bes jılda ellerimiz arasında tovar almasıwdıń bahası úsh esege artıp, 255 million dollarǵa jetti. Maqset – bul kórsetkishti bir milliard dollarǵa shıǵarıw.
Ótken jılı Tashkent hám Baku birge islesiwdiń 20 baǵdarı boyınsha kelisip aldı. Sonıń ishinde, birgelikte “jasıl” energiya islep shıǵarıw hám Ázerbayjan arqalı Evropaǵa eksport etiw.
Bunnan tısqarı, ekonomikalıq rawajlanıwdıń strategiyalıq faktorı sıpatında kóriletuǵın transport-logistika koridorların rawajlandırıw kún tártibinen turaqlı orın iyelegen.
Ótken jılı avgust ayında mámleket basshıları tárepinen qol qoyılǵan Awqamlaslıq qatnasıqları haqqındaǵı shártnama Ózbekstan hám Ázerbayjan sherikligin bunnan bılay da bekkemlewde sheshiwshi áhmiyetke iye. Tariyxıy xarakterge iye bul hújjet tek ǵana Qubla Kavkaz hám Oraylıq Aziyada emes, al pútkil Evroaziyadaǵı processlerge tásir kórsetetuǵın mámleketleraralıq birge islesiwdiń jańa basqıshın sáwlelendiredi.
Mámleketlerimiz BMSh, Qosılmaw háreketi, Túrkiy mámleketler shólkemi, ǴMDA, EBSh (Ekonomikalıq birge islesiw shólkemi) sıyaqlı abıraylı xalıqaralıq strukturalarda bir-birin belsene qollap-quwatlamaqta. Keyingi úsh jıl ishinde mámleket basshıları óz-ara bes márte sapar ámelge asırǵanı siyasiy sóylesiwdiń misli kórilmegen jedelliginen dárek beredi.
Ózbekstan hám Ázerbayjan tárepinen Ekonomikalıq birge islesiw jılı dep járiyalanǵan 2025-jıl eki tárepleme diplomatiyalıq qatnasıq ornatılǵanınıń 30 jıllıǵı belgilenbekte. Bul tariyxıy sáne múnásibeti menen kóplegen ilajlar, sonıń ishinde, joqarı dárejedegi saparlar hám basqa da áhmiyetli baslamalar tayarlanbaqta. Ásirese, gumanitarlıq baylanıslardı bekkemlewge ayrıqsha áhmiyet beremiz. Máselen, eki mámlekette de ullı shayır Nizamiy Ganjawiy tuwılǵanınıń 880 jıllıǵı keńnen belgilenedi.

Muharrama Pirmatova tayyorladi, ÓzA