“Ansa” мәлимлеме агентлиги Италия Республикасы Бас министри Жоржа Мелонидиң “Өзбекстан – стратегиялық шерик, бирге ислесиўди буннан былай да беккемлеймиз” атамасындағы баянатын жәриялады.

– Қатнасықларымыз беккем, бираз ўақыттан берли айрықша дәрежеде, – деди Мелони Самарқанд қаласында Өзбекстан Республикасы Президенти Шавкат Мирзиёев пенен ушырасыў шеңбериндеги баспасөз әнжуманында. – 2023-жылдан баслап стратегиялық шерикликти жаңа басқышқа алып шығыўға ҳәрекет еттик. Енди байланысларды және де беккемлеймиз. Бирге ислесиўди күшейтиў зәрүр болған көплеген бағдарлар бар. Соның ушын бүгиннен баслап ҳәр еки тәрептен барлық тийкарғы тараўлар бойынша анық жумыс алып барыў тилегиниң пайда болғанынан қуўанышлыман. Өзбекстанға, Орайлық Азия регионына дәслепки сапарымнан оғада қуўанышлыман. Маған ҳәм Италия делегациясына көрсетилген айрықша қабыллаў ушын миннетдаршылық билдирмекшимен: ҳақыйқый дослық үлгиси көрсетилди. Байланысларымыз үлкен әҳмийетке ийе.

Европа ҳәм Азия кесилиспесиндеги Самарқандқа сапар етиў мен ушын шексиз имканият болып есапланады.

Мақалада, сондай-ақ, еки тәреплеме стратегиялық шерикликти буннан былай да раўажландырыў, көп тәреплемели бирге ислесиўди кеңейтиў мәселелери көрип шығылғаны, 2023-жыл июнь айында Рим қаласында өткен жоқары дәрежедеги ушырасыўларда ерисилген келисимлер избе-из әмелге асырылып атырғаны атап өтилген.

– Компанияларымыз буннан былай да Өзбекстанға инвестиция киргизиўге таяр, – деди Италия ҳүкиметиниң басшысы. – Өз-ара инвестиция тараўындағы келисим миграция ҳәм кадрлар таярлаў, мәденият мәселелерине тийисли болып, Турин политехника, Пиза ҳәм басқа да университетлер менен әмелге асырылып атырған жойбарлар ҳәм аўыл хожалығы, энергетика, әҳмийетли шийки зат субъектлери бойынша 360 градуслық көлемдеги бирге ислесиў раўажланады. Өзбекстан оғада әҳмийетли шеригимиз.

Муҳарамма Пирматова, ӨзА