“Ansa” málimleme agentligi Italiya Respublikası Bas ministri Jorja Melonidiń “Ózbekstan – strategiyalıq sherik, birge islesiwdi bunnan bılay da bekkemleymiz” atamasındaǵı bayanatın járiyaladı.

– Qatnasıqlarımız bekkem, biraz waqıttan berli ayrıqsha dárejede, – dedi Meloni Samarqand qalasında Ózbekstan Respublikası Prezidenti Shavkat Mirziyoev penen ushırasıw sheńberindegi baspasóz ánjumanında. – 2023-jıldan baslap strategiyalıq sheriklikti jańa basqıshqa alıp shıǵıwǵa háreket ettik. Endi baylanıslardı jáne de bekkemleymiz. Birge islesiwdi kúsheytiw zárúr bolǵan kóplegen baǵdarlar bar. Sonıń ushın búginnen baslap hár eki tárepten barlıq tiykarǵı tarawlar boyınsha anıq jumıs alıp barıw tileginiń payda bolǵanınan quwanıshlıman. Ózbekstanǵa, Oraylıq Aziya regionına dáslepki saparımnan oǵada quwanıshlıman. Maǵan hám Italiya delegaciyasına kórsetilgen ayrıqsha qabıllaw ushın minnetdarshılıq bildirmekshimen: haqıyqıy doslıq úlgisi kórsetildi. Baylanıslarımız úlken áhmiyetke iye.
Evropa hám Aziya kesilispesindegi Samarqandqa sapar etiw men ushın sheksiz imkaniyat bolıp esaplanadı.
Maqalada, sonday-aq, eki tárepleme strategiyalıq sheriklikti bunnan bılay da rawajlandırıw, kóp táreplemeli birge islesiwdi keńeytiw máseleleri kórip shıǵılǵanı, 2023-jıl iyun ayında Rim qalasında ótken joqarı dárejedegi ushırasıwlarda erisilgen kelisimler izbe-iz ámelge asırılıp atırǵanı atap ótilgen.
– Kompaniyalarımız bunnan bılay da Ózbekstanǵa investiciya kirgiziwge tayar, – dedi Italiya húkimetiniń basshısı. – Óz-ara investiciya tarawındaǵı kelisim migraciya hám kadrlar tayarlaw, mádeniyat máselelerine tiyisli bolıp, Turin politexnika, Piza hám basqa da universitetler menen ámelge asırılıp atırǵan joybarlar hám awıl xojalıǵı, energetika, áhmiyetli shiyki zat subektleri boyınsha 360 graduslıq kólemdegi birge islesiw rawajlanadı. Ózbekstan oǵada áhmiyetli sherigimiz.

Muharamma Pirmatova, ÓzA