Мойнақ районында үш күн даўам еткен “Rally Muynak – 2025” авторалли бойынша Өзбекстан чемпионатының жеңимпазларын сыйлықлаў мәресими болып өтти.

Елимиздиң түрли мүйешлеринен ҳәм сырт елден келген спортшылар еки категориядағы автомобильлерде – двигатель көлеми 1600 см3ге шекемги “А-8” ҳәм двигатель көлеми 2000 см3ге шекемги “А-9” класслары бойынша беллести. Сондай-ақ, двигатель көлеми 2000 см3ге шекемги “Багги” ҳәм двигатель көлеми 125 см3ге шекемги ҳәм 500 см3ге шекемги мотоцикллерде жарыслар да шөлкемлестирилди. Автомотоспорт жарысларында 120 дан аслам автомотоспорт шебери, соннан 40 тан аслам автомобиль, 25 тен аслам мотоцикл ҳәм 15 тен аслам “Багги” қатнасты.

Жарыс жуўмағында двигатель көлеми 1600 см3ге шекемги “А-8” класы бойынша биринши орынды Наманган ўәлаятынан Темур Нарзиқулов, Азиз Туропов, екинши орынды Самарқанд ўәлаятынан Фикрат Ахтамов, Фируз Жумаев, үшинши орынды усы ўәлаяттан Илҳом Обиджанов, Владимир Минин ийеледи. Двигатель көлеми 2000 см3ге шекемги “А-9” класы бойынша Бухара ўәлаятынан Рашид Муродов ҳәм Қилич Нарзиқулов биринши, Қашқадәрья ўәлаятынан Умид Тошпулатов ҳәм Жасур Темиров екинши, Ташкент қаласынан Рустам Муҳамедов ҳәм Элёр Раҳмонов үшинши орынларды ийеледи. “Багги” бойынша Жиззақ ўәлаятынан Хуршид Ғаниев, Сырдәрья ўәлаятынан Равшан Қобилов, Әндижан ўәлаятынан Илҳам Аҳмедов сыйлы орынларды ийеледи.

Сондай-ақ, двигатель көлеми 125 см3ге шекемги мотоцикллер бойынша Наўайы ўәлаятынан Багдан Сатурян, Бухара ўәлаятынан Бекзод Халимбаев, Қарақалпақстан Республикасынан Бегарыс Айтбаев, двигатель көлеми 500 см3ге шекемги мотоцикллер бойынша Бухара ўәлаятынан Жасурбек Саматов, усы ўәлаяттан Бахтиёр Аҳмедов ҳәм Наўайы ўәлаятынан Адҳам Темировлар сыйлы орынды ийеледи.

“Rally Muynak – 2025″ автомото спорт жарысларының жеңимпазлары Өзбекстан Республикасы Президентиниң сыйлықлары менен сыйлықланды. Сондай-ақ, жеңимпазларға, тренерлер ҳәм төрешилерге Өзбекстан Республикасы қорғаныўға көмеклесиўши “Ватанпарвар” шөлкеминиӊ Орайлық кеңеси, Туризм комитети, Қарақалпақстан Республикасы Жоқарғы Кеңеси ҳәм Министрлер Кеңесиниң естелик саўғалары тапсырылды.

Қарақалпақстан хабар агентлиги