Кеше С.Мирзиёева ҳәм Мусылман данышпанлар кеңесиниң бас хаткери Муҳаммед Абдусалом арасында ушырасыў болып өтти. Өзбекстан Президентиниң жәрдемшиси ислам дини тийкарында жатқан улыўмаинсаныйлық ҳәм руўхый қәдириятларды қоллап-қуўатлап атырғаны ушын усы халықаралық шөлкемге миннетдаршылық билдирди.

Сондай-ақ, Саида Мирзиёева ҳәр жылы өткерилетуғын Шейх Зоид атындағы «Инсаный дослық» сыйлығының 2026-жылғы төрешилер коллегиясы қурамына киргизилгенинен оғада қуўанышлы екенин билдирди.

«Тек ғана биргеликтеги ҳәрекетлеримиз бенен биз бул дүньяны және де жақсырақ ете аламыз»-деп атап өтти С.Мирзиёева.

Шейх Зоид атындағы «Инсаный дослық» сыйлығы – дүньяның раўажланыўына үлкен үлес қосып атырған, инсан ҳуқықлары, тынышлық ҳәм әдиллик ушын гүресип атырған шахсларға берилетуғын, халықаралық дәрежеде ең жоқары баҳаланатуғын жоқары атақлардан бири болып есапланады.

Бул сыйлық 2019-жылы Рим папасы Франциск ҳәм Ал-Азҳар университети бас имамы Аҳмад Ат-Тойиб арасында Абу-Дабиде болып өткен тарийхый ушырасыў ҳүрметине шөлкемлестирилген болып, олар биргеликте инсаный дослық ҳаққындағы ҳүжжетке қол қойған еди.

БАӘниң тийкарын салыўшысы, марҳум Шейх Зоид ибн Султан Ал-Наҳаянның аты менен аталатуғын бул сыйлық қоры 1 миллион доллар болып, сыйлық пулы социаллық машқалаларға шешим таўып атырған, тынышлық ҳәм татыўлыққа үлес қосып атырған шахслар ҳәм шөлкемлер арасында бөлистириледи.

Қарақалпақстан хабар агентлиги