Keshe S.Mirziyoeva hám Musılman danıshpanlar keńesiniń bas xatkeri Muhammed Abdusalom arasında ushırasıw bolıp ótti. Ózbekstan Prezidentiniń járdemshisi islam dini tiykarında jatqan ulıwmainsanıylıq hám ruwxıy qádiriyatlardı qollap-quwatlap atırǵanı ushın usı xalıqaralıq shólkemge minnetdarshılıq bildirdi.

Sonday-aq, Saida Mirziyoeva hár jılı ótkeriletuǵın Sheyx Zoid atındaǵı «Insanıy doslıq» sıylıǵınıń 2026-jılǵı tóreshiler kollegiyası quramına kirgizilgeninen oǵada quwanıshlı ekenin bildirdi.
«Tek ǵana birgeliktegi háreketlerimiz benen biz bul dúnyanı jáne de jaqsıraq ete alamız»-dep atap ótti S.Mirziyoeva.
Sheyx Zoid atındaǵı «Insanıy doslıq» sıylıǵı – dúnyanıń rawajlanıwına úlken úles qosıp atırǵan, insan huqıqları, tınıshlıq hám ádillik ushın gúresip atırǵan shaxslarǵa beriletuǵın, xalıqaralıq dárejede eń joqarı bahalanatuǵın joqarı ataqlardan biri bolıp esaplanadı.
Bul sıylıq 2019-jılı Rim papası Francisk hám Al-Azhar universiteti bas imamı Ahmad At-Toyib arasında Abu-Dabide bolıp ótken tariyxıy ushırasıw húrmetine shólkemlestirilgen bolıp, olar birgelikte insanıy doslıq haqqındaǵı hújjetke qol qoyǵan edi.
BAÁniń tiykarın salıwshısı, marhum Sheyx Zoid ibn Sultan Al-Nahayannıń atı menen atalatuǵın bul sıylıq qorı 1 million dollar bolıp, sıylıq pulı sociallıq mashqalalarǵa sheshim tawıp atırǵan, tınıshlıq hám tatıwlıqqa úles qosıp atırǵan shaxslar hám shólkemler arasında bólistiriledi.

Qaraqalpaqstan xabar agentligi