Иран Ислам Республикасы Аўғанстан менен шегарада үлкен бетон дийўал қурмақта.

Мағлыўматларға бола, оны қурыўдан тийкарғы мақсет мәмлекетке кирип киятырған нызамсыз мигрантлар ағымын шеклеў ҳәм тәртип орнатыў. Бул қурылыста заманагөй ҳәм алдыңғы мониторинг технологиялары да қолланылыўы нәзерде тутылған.

Жүзлеген километрге созылған дийўал қурылысының үлкен бөлеги әллеқашан қурылып та болынған ҳәм қурылыс жедел пәтте алып барылмақта. Шегарадағы бул иркиниш үлкен бетон плиталардан дүзилген болып, олар кранлар жәрдеминде орнатылмақта.

Ҳүкимет дийўал менен тек ғана нызамсыз мигрантлар емес, ал контрабанда ҳәрекетлери ҳәм ҳәр қыйлы нызамсыз саўда бағдарларын да шеклеўди мақсет еткен.

Соңғы жыллары Аўғанстандағы тынышсыз жағдай себепли Иранға көплеген аўғанстанлылар кирип келиўди баслаған ҳәм бул мәмлекет ушын ҳәр қыйлы экономикалық ҳәм социаллық машқалаларды пайда еткен.

Қарақалпақстан хабар агентлиги