Америка Қурама Штатлары Жорж Вашингтон университети жанындағы Орайлық Азия бағдарламасы шеңберинде мәмлекетимиздиң Аўғанстанға байланыслы қәлиплесип атырған стратегиясына бағышланған экспертлердиң дөгерек сәўбети болып өтти. Илажда Орайлық Азия ҳәм Аўғанстан мәселелерине қәнигелескен жетекши қәнигелер, профессор-оқытыўшылар, аспирантлар ҳәм студентлер қатнасты.

Ушырасыў даўамында Орайлық Азия халықаралық институтының директоры Жавлон Ваҳобов мәмлекетимиздиң усы темаға прагматикалық бирге ислесиў, инсан мәпине қаратылған раўажланыў ҳәм трансмиллий инфраструктура интеграциясы принципи тийкарындағы қатнасы ҳаққында сөз болды. Атап өтилиўинше, Өзбекстан Аўғанстанды өз алдына геосиясий аймақ емес, ал жақын қоңсы, өз келешегиниң ажыралмас бөлеги сыпатында көреди.

Экспертлер Трансаўған темир жолы, Сурхан – Пули-Хумри жоқары күшлениўли электр узатыў тармағы ҳәм ТАПИ газ қубыры сыяқлы тийкарғы инфраструктуралық жойбарларды додалады. Бул жойбарлар қоңсы елдиң экономикалық турақлылығын арттырып, регионаллық ҳәм глобал экономикалық процесске тереңирек интеграцияласыўына хызмет ететуғынына исеним билдирилди.

Республикамыз тәрепинен Аўғанстанға көрсетилип атырған жәрдем – турақлы гуманитарлық жәрдем жеткерип бериў, саўда, билимлендириў ҳәм социаллық реинтеграцияны раўажландырыў басламаларына айрықша итибар қаратылды. 2024-жылы Термиз қаласында ашылған еркин экономикалық зона он мыңлаған, соның ишинде Аўғанстан пуқараларын қабыл етип атырғанына итибар берилди.

Илаж соңында Өзбекстанның Аўғанстанды регионаллық процесслерге тартыў стратегиясы турақлы тынышлық ҳәм раўажланыў ушын үлги болыўы мүмкин екенлиги атап өтилди. Усы бағдарда сөйлесиўди даўам еттириў ҳәм бирге ислесиўди тереңлестириўге таярлық билдирилди.

Ғ.Хонназаров, ӨзА