Amerika Qurama Shtatları Jorj Vashington universiteti janındaǵı Oraylıq Aziya baǵdarlaması sheńberinde mámleketimizdiń Awǵanstanǵa baylanıslı qáliplesip atırǵan strategiyasına baǵıshlanǵan ekspertlerdiń dógerek sáwbeti bolıp ótti. Ilajda Oraylıq Aziya hám Awǵanstan máselelerine qánigelesken jetekshi qánigeler, professor-oqıtıwshılar, aspirantlar hám studentler qatnastı.

Ushırasıw dawamında Oraylıq Aziya xalıqaralıq institutınıń direktorı Javlon Vahobov mámleketimizdiń usı temaǵa pragmatikalıq birge islesiw, insan mápine qaratılǵan rawajlanıw hám transmilliy infrastruktura integraciyası principi tiykarındaǵı qatnası haqqında sóz boldı. Atap ótiliwinshe, Ózbekstan Awǵanstandı óz aldına geosiyasiy aymaq emes, al jaqın qońsı, óz kelesheginiń ajıralmas bólegi sıpatında kóredi.
Ekspertler Transawǵan temir jolı, Surxan – Puli-Xumri joqarı kúshleniwli elektr uzatıw tarmaǵı hám TAPI gaz qubırı sıyaqlı tiykarǵı infrastrukturalıq joybarlardı dodaladı. Bul joybarlar qońsı eldiń ekonomikalıq turaqlılıǵın arttırıp, regionallıq hám global ekonomikalıq processke tereńirek integraciyalasıwına xızmet etetuǵınına isenim bildirildi.
Respublikamız tárepinen Awǵanstanǵa kórsetilip atırǵan járdem – turaqlı gumanitarlıq járdem jetkerip beriw, sawda, bilimlendiriw hám sociallıq reintegraciyanı rawajlandırıw baslamalarına ayrıqsha itibar qaratıldı. 2024-jılı Termiz qalasında ashılǵan erkin ekonomikalıq zona on mıńlaǵan, sonıń ishinde Awǵanstan puqaraların qabıl etip atırǵanına itibar berildi.
Ilaj sońında Ózbekstannıń Awǵanstandı regionallıq processlerge tartıw strategiyası turaqlı tınıshlıq hám rawajlanıw ushın úlgi bolıwı múmkin ekenligi atap ótildi. Usı baǵdarda sóylesiwdi dawam ettiriw hám birge islesiwdi tereńlestiriwge tayarlıq bildirildi.

Ǵ.Xonnazarov, ÓzA