Экономика ҳәм қаржы министрлигинде Өзбекстан ҳәм Түркия арасындағы саўда-экономикалық бирге ислесиў бойынша Ҳүкиметлераралық комиссия шеңберинде Жумысшы топардың гезектеги додалаў мәжилиси болып өтти.

Мәжилисте Түркия Республикасы Коммерция министрлиги департаментиниң директоры Хакки Бурунчу басшылығындағы жуўапкер министрлик ҳәм уйымлардың қәнигелери, сондай-ақ, Өзбекстан тәрепинен Экономика ҳәм қаржы министрлиги ҳәм тийисли министрликлер менен уйымлар, тармақ шөлкемлериниң ўәкиллери қатнасты.

Илажда Ҳүкиметлераралық комиссияның 8-мәжилиси «Ҳәрекетлер режеси»нде белгиленген ўазыйпалардың орынланыўы ҳәр тәреплеме додаланды. Тосқынлықларды сапластырыў бойынша анық усыныслар билдирилди ҳәм келешекте әмелге асырылыўы режелестирилген инвестициялық ҳәм экономикалық жойбарларды жеделлестириў мәселелери көрип шығылды.

Сондай-ақ, быйыл 14-15-май күнлери Ташкент қаласында өткерилиўи режелестирилип атырған Ҳүкиметлераралық комиссияның 8-мәжилиси ҳәм Бизнес-форумына таярлық көриў бойынша әмелий илажлар белгиленди.

Мәжилис соңында тәреплер өз-ара пайдалы бирге ислесиўди және де раўажландырыў, «Ҳәрекетлер режеси»нде нәзерде тутылған мақсетлерге ерисиў ҳәм нәтийжели, ҳәм системалы жумысты даўам еттириў бойынша келисимге еристи.

Н.Зиёдуллаева, ӨзА