Усы жылы 25-мартта «Мәмлекетлик бажыхана уйымларының жумысын шөлкемлестириў ҳәм бажыхана ҳәкимшилигин және де жетилистириўдиң қосымша илажлары ҳаққында» Президент қарары қабыл етилди.

Қарарға муўапық, 2025-жылы бажыхана тараўын раўажландырыў мақсетинде тараўға жасалма интеллект технологиялары енгизиледи, бажыхана уйымларының мәлимлеме системалары жетилистириледи ҳәм нәтийжелилиги арттырылады, бажыхана уйымларының шөлкемлестириў структуралары оптималластырылады.

Бажыхана комитети системасында Бажыхана рәсмийлестириўи орайы шөлкемлестириледи. Онда аймақлық басқармалардың аралықтан электрон декларациялаў бажыхана постлары басқышпа-басқыш сапластырылады. Бажыхана комитети қурамында бажыхана тараўына жасалма интеллект технологияларын енгизиўге қәнигелескен структура шөлкемлестириледи.

Структура жасалма интеллект технологиялары тараўында раўажланған сырт еллердиң тәжирийбелерин үйрениў, бажыхана қадағалаўы ҳәм рәсмийлестериўин қамтып алған жасалма интеллект технологияларын изертлеў, олардың нәтийжели ислеўин тәмийинлеў ҳәм турақлы түрде сапа жағынан жаңа басқышқа алып шығыў илажлары көриледи. Бажыхана тараўына жасалма интеллект технологияларын енгизиўге қәнигелескен Бажыхана комитетиниң Мәлимлеме-коммуникация технологиялары ҳәм киберқәўипсизликти тәмийинлеў басқармасы қурамында «Жасалма интеллект технологияларын изертлеў бөлими» шөлкемлестириледи.

Бөлим бажыхана уйымларында жасалма интеллект технологияларын енгизиў бойынша жойбар менеджери болып есапланады. Жасалма интеллект технологиялары тараўында раўажланған сырт еллердиң тәжирийбелерин үйрениў бөлиминиң тийкарғы ўазыйпасы болып есапланады. Бажыхана қадағалаўы ҳәм рәсмийлестириўин қамтып алған жасалма интеллект технологияларын изертлеў, олардың нәтийжели ислеўин тәмийинлеў ҳәм турақлы түрде сапа  жағынан жаңа басқышқа алып шығыў илажлары көриледи.

Бул бағдарда жергиликли ҳәм халықаралық қәнигелер ҳәм раўажланған сырт еллер менен илимий ҳәм әмелий тәжирийбе алмасыў бойынша бирге ислесиў, жасалма интеллект технологияларын сынақтан өткериў ҳәм әмелиятқа енгизиў белгиленди. Бажыхана тараўына жасалма интеллект технологияларын енгизиў ҳәм жетилистириў мақсетинде Бажыхана комитети баслығының жасалма интеллект технологияларын енгизиў бойынша мәсләҳәтшиси лаўазымы енгизиледи.

Ш.Маматуропова, ӨзА