Олий Мажлис Сенатына Беларусь Республикасының Өзбекстандағы елшиси А.Огордников келди.

Халықаралық қатнасықлар, сыртқы экономикалық байланыслар, сырт ел инвестициялары ҳәм туризм мәселелери комитети баслығының орынбасары О.Маматкаримов пенен ушырасыўда еки мәмлекет арасындағы саўда-экономикалық, мәдений-гуманитарлық ҳәм туризм тараўларындағы бирге ислесиў додаланды.

Еки мәмлекет арасындағы жыллық саўда айланысы 600 миллион АҚШ долларынан асқаны атап өтилди.

Беларусь елшиси Минскте өткерилген биринши Беларусь – Өзбекстан туристлик форумы ҳаққында мағлыўмат берип, усы жылы Ташкентте екинши форум өткерилиўи режелестирилгенин атап өтти. Сондай-ақ, усы жылдың 20-21-август күнлери Витебск қаласында үшинши Беларусь-Өзбекстан ҳаял-қызлар форумы болып өтиўи мәлим етилди.

Ушырасыўда 5-9-апрель күнлери Ташкентте Парламентлераралық аўқамның 150-юбилей ассамблеясы өткерилиўи ҳәм онда 190ға шамалас мәмлекеттен 2 мыңға шамалас парламент ағзалары қатнасыўы додаланды. Беларусь делегациясы усы илажда жоқары дәрежеде қатнасатуғыны мәлим етилди.

Н.Абдураимова,

ӨзА