Өзбекстан Республикасы Президенти Шавкат Мирзиёев 14-март күни Россия Федерациясы Федерал Мәжлиси Мәмлекетлик Думасының Баслығы Вячеслав Володинди қабыллады. Өзбекстан менен Россия арасында кең көлемли стратегиялық шериклик ҳәм аўқамласлық қатнасықларының әҳмийетли мәселелери көрип шығылды.

Ушырасыў басында жоқары мәртебели мийман мәмлекетимиз басшысына Россия Федерациясы Президенти Владимир Путинниң сәлемин ҳәм ең жақсы тилеклерин жеткерди.

Өткен жылы май айында Россия Президентиниң Өзбекстанға сапары ўақтында ерисилген келисимлердиң әмелге асырылыўын қадағалаў мақсетинде парламентлераралық бирге ислесиўди кеңейтиўге айрықша итибар қаратылды.

Мәмлекетимиз жетекшиси Парламентлераралық комиссияның екинши мәжилисине пуқта таярлық көриў ҳәм оны өткериў зәрүрлигин атап өтти.

Саўда-экономикалық ҳәм инвестициялық бирге ислесиўдиң әҳмийетли жойбарларын, мийнет миграциясы ҳәм мәдений-гуманитарлық алмасыў бағдарындағы биргеликтеги бағдарламаларды қоллап-қуўатлаў ҳәм жеделлестириўге парламентлердиң белсене қатнасыўы зәрүрлиги атап өтилди.

ӨзА