Ózbekstan Respublikası Prezidenti Shavkat Mirziyoev 14-mart kúni Rossiya Federaciyası Federal Májlisi Mámleketlik Dumasınıń Baslıǵı Vyacheslav Volodindi qabılladı. Ózbekstan menen Rossiya arasında keń kólemli strategiyalıq sheriklik hám awqamlaslıq qatnasıqlarınıń áhmiyetli máseleleri kórip shıǵıldı.

Ushırasıw basında joqarı mártebeli miyman mámleketimiz basshısına Rossiya Federaciyası Prezidenti Vladimir Putinniń sálemin hám eń jaqsı tileklerin jetkerdi.

Ótken jılı may ayında Rossiya Prezidentiniń Ózbekstanǵa saparı waqtında erisilgen kelisimlerdiń ámelge asırılıwın qadaǵalaw maqsetinde parlamentleraralıq birge islesiwdi keńeytiwge ayrıqsha itibar qaratıldı.

Mámleketimiz jetekshisi Parlamentleraralıq komissiyanıń ekinshi májilisine puqta tayarlıq kóriw hám onı ótkeriw zárúrligin atap ótti.

Sawda-ekonomikalıq hám investiciyalıq birge islesiwdiń áhmiyetli joybarların, miynet migraciyası hám mádeniy-gumanitarlıq almasıw baǵdarındaǵı birgeliktegi baǵdarlamalardı qollap-quwatlaw hám jedellestiriwge parlamentlerdiń belsene qatnasıwı zárúrligi atap ótildi.

ÓzA