Өзбекстан Республикасы Президенти Шавкат Мирзиёев 11-март күни болып өткен телефон арқалы сөйлесиўде Бирлескен Араб Әмирликлери Президенти Шайх Муҳаммад Бин Зоид Ол Наҳаянды туўылған күни менен шын жүректен қутлықлады.

Мәмлекетимиз жетекшиси БАӘ Президентине беккем денсаўлық ҳәм абаданлық, мәмлекетлик жумысында үлкен табыслар, дос Әмирликлер халқына тынышлық-татыўлық ҳәм раўажланыў тиледи. Мәмлекет басшылары бүгин мусылман үммети ушын муқаддес болған Рамазан айы мүнәсибети менен де бирин-бири қызғын қутлықлады.

Өзбекстан Президентиниң усы жылдың январь айында  БАӘге әмелге асырған сапары еки тәреплеме қатнасықлар тарийхында жаңа бет ашып, оларды стратегиялық шериклик дәрежесине көтергени айрықша атап өтилди. Ерисилген келисимлерди әмелге асырыў ушын айрықша «жол картасы» қабыл етилди.

Жетекшилер Өзбекстан менен БАӘ арасындағы көп тәреплеме бирге ислесиў бәринен бурын, саўда-экономикалық ҳәм инвестициялық тараўларда жедел раўажланып атырғанын үлкен қанаатланыўшылық пенен атап өтти. Товар алмасыў ҳәм инвестициялардың көлеми, биргеликтеги кәрханалардың саны басқышпа-басқыш артып бармақта.

Бүгинги күнде 20 миллиард долларлық жойбарлар портфели шеңберинде Әмирликлердиң жетекши компаниялары менен «жасыл» энергетика, санластырыў, жасалма интеллект, қала қурылысы ҳәм инфраструктура, туризм, жеке меншик бизнес сыяқлы әҳмийетли бағдарларда жедел бирге ислесип келмекте.

Самарқанд қаласында «Орайлық Азия – Араб қолтығы мәмлекетлери бирге ислеасиў кеңеси» сөйлесиўиниң екинши саммитин өткериў мәселелери де көрип шығылды.

ӨзА