Ózbekstan Respublikası Prezidenti Shavkat Mirziyoev 11-mart kúni bolıp ótken telefon arqalı sóylesiwde Birlesken Arab Ámirlikleri Prezidenti Shayx Muhammad Bin Zoid Ol Nahayandı tuwılǵan kúni menen shın júrekten qutlıqladı.

Mámleketimiz jetekshisi BAÁ Prezidentine bekkem densawlıq hám abadanlıq, mámleketlik jumısında úlken tabıslar, dos Ámirlikler xalqına tınıshlıq-tatıwlıq hám rawajlanıw tiledi. Mámleket basshıları búgin musılman úmmeti ushın muqaddes bolǵan Ramazan ayı múnásibeti menen de birin-biri qızǵın qutlıqladı.
Ózbekstan Prezidentiniń usı jıldıń yanvar ayında BAÁge ámelge asırǵan saparı eki tárepleme qatnasıqlar tariyxında jańa bet ashıp, olardı strategiyalıq sheriklik dárejesine kótergeni ayrıqsha atap ótildi. Erisilgen kelisimlerdi ámelge asırıw ushın ayrıqsha «jol kartası» qabıl etildi.
Jetekshiler Ózbekstan menen BAÁ arasındaǵı kóp tárepleme birge islesiw bárinen burın, sawda-ekonomikalıq hám investiciyalıq tarawlarda jedel rawajlanıp atırǵanın úlken qanaatlanıwshılıq penen atap ótti. Tovar almasıw hám investiciyalardıń kólemi, birgeliktegi kárxanalardıń sanı basqıshpa-basqısh artıp barmaqta.
Búgingi kúnde 20 milliard dollarlıq joybarlar portfeli sheńberinde Ámirliklerdiń jetekshi kompaniyaları menen «jasıl» energetika, sanlastırıw, jasalma intellekt, qala qurılısı hám infrastruktura, turizm, jeke menshik biznes sıyaqlı áhmiyetli baǵdarlarda jedel birge islesip kelmekte.
Samarqand qalasında «Oraylıq Aziya – Arab qoltıǵı mámleketleri birge isleasiw keńesi» sóylesiwiniń ekinshi sammitin ótkeriw máseleleri de kórip shıǵıldı.
ÓzA