Бәҳәр мәўсими кирип келиўи менен елимизде байрамлар басланып, орынларда ҳәр қыйлы байрам илажлары өткерилмекте.

Өзбекстанда кәсиплик аўқамлары ҳәрекетиниң 120 жыллығы менен Ташкент қаласында болып өткен «Заманагөй кәсиплик аўқамы ҳәрекетинде ҳаял-қызлардың роли» атамасында Ташкент қаласында илаж болып өтти. Онда кәсиплик аўқамларының атқаратуғын роли, хызметкерлерге жаратылып атырған имканиятлар ҳаққында сөз етилип, тараўда ҳаял-қызлардың тутқан орны  ҳәм хызметлери ҳаққында сөз етилди. Илаж шеңберинде таңлаў  шөлкемлестирилип, онда қатнасқан ҳаял-қызлар ҳәр қыйлы номинациялар менен сыйлықланды. Онда кәсиплик аўқамы Тақыятас районлық кеңеси баслығы Саёра Бекимбетова да белсене қатнасып, екинши орынды ийелеп, «Заманагөй ҳаял» номинациясын алыўға миясар болды.

-Тараўларда мийнет етип атырған хызметкерлердиң социаллық, экономикалық ҳәм ҳуқықый жақтан  исенимли қорғаў шеңбериндеги кейслер ҳәм сораўларға жуўап бериў, машқалалы жағдайлардың шешимин табыў, «Миллий қәдириятларымыз-кәсиплик аўқамының нәзеринде» темасында шығып сөйлеўлер таңлаўдың тийкарғы шәрти болды. Мен миллий қәдириятларымыз тийкарында алып барылып атырған жумысларымыз ҳаққында сөз етип, басқа да шәртлерде өз белсендилигимди көрсетиўге ҳәрекет еттим,-дейди С.Бекимбетова.

Қарақалпақстан хабар агентлиги