Өзбекстан өнимлери ушын потенциал экспорт базарлары ҳәм буйыртпашылардың талабы үйренилди.

Макроэкономикалық ҳәм аймақлық изертлеўлер институты экспертлериниң go4WorldBusiness платформасының мағлыўматларына тийкарланып ислеп шыққан бул бағдарларда Өзбекстанда салыстырмалы үстинликке ийе болған өнимлер ушын сырт елдеги потенциал базарлар дизими келтириледи.

Оған бола:

Мийўе-овощлар ҳәм олардан таярланған ҳәр қыйлы шербетлер.

Аймақлар – Сурхандәрья, Хорезм, Ферғана, Самарқанд, Қашқадәрья ҳәм Әндижан ўәлаятлары

Потенциал базарлар – Ҳиндстан, БАӘ, Уллы Британия, АҚШ, Малайзия ҳәм Сингапур

Жип-гезелеме, кийимлер, химиялық талшық ҳәм тери өнимлери.

Аймақлар – Наманган, Қашқадәрья, Ташкент ҳәм Сырдәрья ўәлаятлары ҳәм Қарақалпақстан Республикасы

Потенциал базарлар – Испания ҳәм Индонезия

Төгинлер, химиялық өнимлер, ун ҳәм крахмал.

Аймақлар – Ферғана, Наўайы ҳәм Ташкент ўәлаяты, Ташкент қаласы

Потенциал базарлар – Қытай, Малайзия, Ҳиндстан, Корея Республикасы, Шри Ланка

Баҳалы таслар ҳәм металлар, цинк ҳәм мыс өнимлери.

Аймақлар – Наўайы ҳәм Ташкент ўәлаяты, Ташкент қаласы

Потенциал базарлар – АҚШ, Япония, БАӘ, Корея Республикасы, Таиланд, Қытай, Ҳиндстан, Вьетнам

Атап өтилиўинше, бул өнимлер буйыртпашыларының 73 проценти өнимди ислеп шығарыў, қамсызландырыў ҳәм жеткерип бериў қәрежетлери сатыўшыға жүклениў талабын қойған (CIF).

Қарыйдарлардың 61 проценти болса төлем түри сыпатында аккредитивин (халықаралық саўдада риск дәрежеси киши болған ең исенимли төлем түри – (Letter of Credit), 16 проценти банк арқалы тиккелей өткермелерди, 11 проценти телеграфиялық пул өткермесин (TT  – Telegraphic Transfer) мақул көреди.

Буйыртпашылардың 81 проценти ушын өнимди жеткерип бериўши кәрхана қайсы мәмлекеттен екенлигиниң әҳмийети жоқ ҳәм бул базарларға өзбекстанлы исбилерменлер де кирип барыў имканиятына ийе.

«Аймақларда транспорт ҳәм экспорт инфраструктурасының бул потенциал базарларға шығыў ушын бейимлестирилиўи, экспортшы кәрханаларға жақыннан консультатив ҳәм қаржылай жәрдем берилиўи экспорт көлеминиң артыўы, нәтийжелиликтиң жақсыланыўы, инновациялық жумыстың жеделлесиўи, халықтың турмыс дәрежесиниң артыўына хызмет етеди»,-делинеди орай мәлимлемесинде.

Қарақалпақстан хабар агентлиги