Ózbekstan ónimleri ushın potencial eksport bazarları hám buyırtpashılardıń talabı úyrenildi.

Makroekonomikalıq hám aymaqlıq izertlewler institutı ekspertleriniń go4WorldBusiness platformasınıń maǵlıwmatlarına tiykarlanıp islep shıqqan bul baǵdarlarda Ózbekstanda salıstırmalı ústinlikke iye bolǵan ónimler ushın sırt eldegi potencial bazarlar dizimi keltiriledi.
Oǵan bola:
Miywe-ovoshlar hám olardan tayarlanǵan hár qıylı sherbetler.
Aymaqlar – Surxandárya, Xorezm, Ferǵana, Samarqand, Qashqadárya hám Ándijan wálayatları
Potencial bazarlar – Hindstan, BAÁ, Ullı Britaniya, AQSh, Malayziya hám Singapur
Jip-gezeleme, kiyimler, ximiyalıq talshıq hám teri ónimleri.
Aymaqlar – Namangan, Qashqadárya, Tashkent hám Sırdárya wálayatları hám Qaraqalpaqstan Respublikası
Potencial bazarlar – Ispaniya hám Indoneziya
Tóginler, ximiyalıq ónimler, un hám kraxmal.
Aymaqlar – Ferǵana, Nawayı hám Tashkent wálayatı, Tashkent qalası
Potencial bazarlar – Qıtay, Malayziya, Hindstan, Koreya Respublikası, Shri Lanka
Bahalı taslar hám metallar, cink hám mıs ónimleri.
Aymaqlar – Nawayı hám Tashkent wálayatı, Tashkent qalası
Potencial bazarlar – AQSh, Yaponiya, BAÁ, Koreya Respublikası, Tailand, Qıtay, Hindstan, Vetnam
Atap ótiliwinshe, bul ónimler buyırtpashılarınıń 73 procenti ónimdi islep shıǵarıw, qamsızlandırıw hám jetkerip beriw qárejetleri satıwshıǵa júkleniw talabın qoyǵan (CIF).
Qarıydarlardıń 61 procenti bolsa tólem túri sıpatında akkreditivin (xalıqaralıq sawdada risk dárejesi kishi bolǵan eń isenimli tólem túri – (Letter of Credit), 16 procenti bank arqalı tikkeley ótkermelerdi, 11 procenti telegrafiyalıq pul ótkermesin (TT – Telegraphic Transfer) maqul kóredi.
Buyırtpashılardıń 81 procenti ushın ónimdi jetkerip beriwshi kárxana qaysı mámleketten ekenliginiń áhmiyeti joq hám bul bazarlarǵa ózbekstanlı isbilermenler de kirip barıw imkaniyatına iye.
«Aymaqlarda transport hám eksport infrastrukturasınıń bul potencial bazarlarǵa shıǵıw ushın beyimlestiriliwi, eksportshı kárxanalarǵa jaqınnan konsultativ hám qarjılay járdem beriliwi eksport kóleminiń artıwı, nátiyjeliliktiń jaqsılanıwı, innovaciyalıq jumıstıń jedellesiwi, xalıqtıń turmıs dárejesiniń artıwına xızmet etedi»,-delinedi oray málimlemesinde.

Qaraqalpaqstan xabar agentligi