Өзбекстанда Германия мийнет базарына бейимлескен оқыў орайларының ашылыўы режелестирилмекте. Бул орайлар Германия мийнет базары талапларына жуўап беретуғын кәсиплик билимлендириў бағдарламаларын усынады.

Питкериўшилер Германияда табыслы жумысқа орналасыўы ушын зәрүр болған көнликпе ҳәм маманлықларды ийелеўи нәзерде тутылған. Бул баслама Өзбекстан ҳәм Германия арасында билимлендириў ҳәм мийнет базарындағы бирге ислесиўди беккемлеўге қаратылған.

Усы жойбар шеңберинде Сыртқы ислер министриниң орынбасары Олим Абдуллаев ҳәм Германияның «SBH West GmbH» шөлкеми ўәкиллери ушырасыў өткерди. Сөйлесиўлерде Өзбекстан пуқараларын Германияда жумыс пенен тәмийинлеў, соның ишинде, жүк ҳәм автобус айдаўшысы сыпатында жумысқа орналастырыўға қаратылған меморандумның әмелге асырылыў мәселеси додаланды. Бул меморандум арқалы еки мәмлекет арасындағы мийнет миграциясын жаңа басқышқа алып шығыў мақсети гөзленген.

Тәреплер, сондай-ақ, «SBH West GmbH» оқыў орайларының Өзбекстан аймақларында филиалларын шөлкемлестириўге келисип алды. Бул оқыў орайлары заманагөй билимлендириў бағдарламаларын усынып, Германия мийнет базарында талап етилетуғын қәнигелерди таярлайды. Бундай билимлендириў мәкемелери арқалы өзбекстанлылар Германияда қәнигели жумыс орынларын ийелеў имканиятына ийе болады.

Келисимлердиң әмелге асырылыўы нәтийжесинде өзбекстанлылар ушын халықаралық мийнет базарларында жаңа жумыс орынлары жаратылады. Бул еки мәмлекет арасында билимлендириў, миграция ҳәм маманлығын арттырыў бағдарларында бирге ислесиўди және де беккемлеўде әҳмийетли қәдем болады.

Қарақалпақстан хабар агентлиги