Ózbekstanda Germaniya miynet bazarına beyimlesken oqıw oraylarınıń ashılıwı rejelestirilmekte. Bul oraylar Germaniya miynet bazarı talaplarına juwap beretuǵın kásiplik bilimlendiriw baǵdarlamaların usınadı.

Pitkeriwshiler Germaniyada tabıslı jumısqa ornalasıwı ushın zárúr bolǵan kónlikpe hám mamanlıqlardı iyelewi názerde tutılǵan. Bul baslama Ózbekstan hám Germaniya arasında bilimlendiriw hám miynet bazarındaǵı birge islesiwdi bekkemlewge qaratılǵan.
Usı joybar sheńberinde Sırtqı isler ministriniń orınbasarı Olim Abdullaev hám Germaniyanıń «SBH West GmbH» shólkemi wákilleri ushırasıw ótkerdi. Sóylesiwlerde Ózbekstan puqaraların Germaniyada jumıs penen támiyinlew, sonıń ishinde, júk hám avtobus aydawshısı sıpatında jumısqa ornalastırıwǵa qaratılǵan memorandumnıń ámelge asırılıw máselesi dodalandı. Bul memorandum arqalı eki mámleket arasındaǵı miynet migraciyasın jańa basqıshqa alıp shıǵıw maqseti gózlengen.
Tárepler, sonday-aq, «SBH West GmbH» oqıw oraylarınıń Ózbekstan aymaqlarında filialların shólkemlestiriwge kelisip aldı. Bul oqıw orayları zamanagóy bilimlendiriw baǵdarlamaların usınıp, Germaniya miynet bazarında talap etiletuǵın qánigelerdi tayarlaydı. Bunday bilimlendiriw mákemeleri arqalı ózbekstanlılar Germaniyada qánigeli jumıs orınların iyelew imkaniyatına iye boladı.
Kelisimlerdiń ámelge asırılıwı nátiyjesinde ózbekstanlılar ushın xalıqaralıq miynet bazarlarında jańa jumıs orınları jaratıladı. Bul eki mámleket arasında bilimlendiriw, migraciya hám mamanlıǵın arttırıw baǵdarlarında birge islesiwdi jáne de bekkemlewde áhmiyetli qádem boladı.

Qaraqalpaqstan xabar agentligi