14-январь – Ўатан қорғаўшылары күни
14-январь – Ўатан қорғаўшылары күни мүнәсибети менен Муҳаммед ал-Хорезмий атындағы Ташкент информация-технологиялары университети Нөкис филиалында да байрам илажы болып өтти.
Филиал директоры ўазыйпасын ўақтынша атқарыўшы, профессор Р.Өтениязов илажды кирис сөз бенен ашып, жыйналғанларды байрам менен қызғын қутлықлап, ер-жигитлеримизге күш-қуўат, беккем денсаўлық тиледи.
Илажда атап өтилгениндей, Ўатан қорғаўшылары күни тек ғана әскерий хызметкерлер емес, ал ҳәзирги ўақытта армия қатарларында өз хызметин өтеп қайтқан ўатанласларымыз ҳәм ертең хызметке кететуғын мыңлаған жигитлердиң байрамы есапланады.
Ана-журтымыз бәрқулла өзиниң мәрт, батыр жигитлери менен мақтанып келген. Жигитлеримиз ата-анасы ҳәм шаңарағын, өзи жасап атырған елдиң топырағын муқаддес билетуғын, Ўатанды қорғаў ушын бәрқулла таяр турыўды миннет деп есаплаған. Бул байрамның белгилениўи халқымыздың өз миллий армиясына шексиз ҳүрметин, ал жигитлерине деген мақтанышын билдиреди.
Илаж даўамында филиал ҳаял-қызлары тәрепинен таярланған байрам саўғалары, ер-жигитлердиң тезлигин сынаўшы қызықлы ойын ҳәм викториналар, эстрада ўәкиллериниң шығыўлары жыйналғанларға ҳақыйқый байрам кейпиятын бағышлады.
Қарақалпақстан хабар агентлиги