14-yanvar – Watan qorǵawshıları kúni

14-yanvar – Watan qorǵawshıları kúni múnásibeti menen Muhammed al-Xorezmiy atındaǵı Tashkent informaciya-texnologiyaları universiteti Nókis filialında da bayram ilajı bolıp ótti.
Filial direktorı wazıypasın waqtınsha atqarıwshı, professor R.Óteniyazov ilajdı kiris sóz benen ashıp, jıynalǵanlardı bayram menen qızǵın qutlıqlap, er-jigitlerimizge kúsh-quwat, bekkem densawlıq tiledi.
Ilajda atap ótilgenindey, Watan qorǵawshıları kúni tek ǵana áskeriy xızmetkerler emes, al házirgi waqıtta armiya qatarlarında óz xızmetin ótep qaytqan watanlaslarımız hám erteń xızmetke ketetuǵın mıńlaǵan jigitlerdiń bayramı esaplanadı.
Ana-jurtımız bárqulla óziniń márt, batır jigitleri menen maqtanıp kelgen. Jigitlerimiz ata-anası hám shańaraǵın, ózi jasap atırǵan eldiń topıraǵın muqaddes biletuǵın, Watandı qorǵaw ushın bárqulla tayar turıwdı minnet dep esaplaǵan. Bul bayramnıń belgileniwi xalqımızdıń óz milliy armiyasına sheksiz húrmetin, al jigitlerine degen maqtanıshın bildiredi.
Ilaj dawamında filial hayal-qızları tárepinen tayarlanǵan bayram sawǵaları, er-jigitlerdiń tezligin sınawshı qızıqlı oyın hám viktorinalar, estrada wákilleriniń shıǵıwları jıynalǵanlarǵa haqıyqıy bayram keypiyatın baǵıshladı.

Qaraqalpaqstan xabar agentligi