Бердақ атындағы Қарақалпақ мәмлекетлик университетинде Европа грант жойбарларында қатнасыў бойынша онлайн тәризде «ЗООМ» платформасы арқалы семинар болып өтти. Онда университеттиң халықаралық байланыслар бойынша проректоры Т.Нурымбетов, университет профессор-оқытыўшылары қатнасты.
Семинарда Норвегиядағы Осло университети профессоры Смағул Қаражанов илимий ҳәм инновациялық жумысларды раўажландырыў мақсетинде грант жойбарларында қатнасыўдың әҳмийети ҳәм абзаллықлары ҳаққында айтып өтти.
Семинар даўамында грантлар алыў процесиниң тийкарғы басқышлары, оған зәрүр болған ҳүжжетлер ҳәм талаплар, сондай-ақ, халықаралық ҳәм жергиликли грант системаларының өзине тән өзгешеликлери ҳаққында толық түсиниклер берилди.
Буннан соң, профессор-оқытыўшылар ҳәм студентлер ушын грант жойбарларында қатнасыў бойынша әмелий усыныслар берилди.
Илажда қатнасыўшылар грант бағдарламаларынан қалай пайдаланыў ҳәм оларды нәтийжели әмелге асырыў бойынша өзлериниң сораўларына жуўаплар алып, бул бойынша зәрүр болған билим ҳәм көнликпелерге ийе болды.
Адилбай Оразов,
Қарақалпақстан хабар агентлиги шолыўшысы