Berdaq atındaǵı Qaraqalpaq mámleketlik universitetinde Evropa grant joybarlarında qatnasıw boyınsha onlayn tárizde «ZOOM» platforması arqalı seminar bolıp ótti. Onda universitettiń xalıqaralıq baylanıslar boyınsha prorektorı T.Nurımbetov, universitet professor-oqıtıwshıları qatnastı.
Seminarda Norvegiyadaǵı Oslo universiteti professorı Smaǵul Qarajanov ilimiy hám innovaciyalıq jumıslardı rawajlandırıw maqsetinde grant joybarlarında qatnasıwdıń áhmiyeti hám abzallıqları haqqında aytıp ótti.
Seminar dawamında grantlar alıw procesiniń tiykarǵı basqıshları, oǵan zárúr bolǵan hújjetler hám talaplar, sonday-aq, xalıqaralıq hám jergilikli grant sistemalarınıń ózine tán ózgeshelikleri haqqında tolıq túsinikler berildi.
Bunnan soń, professor-oqıtıwshılar hám studentler ushın grant joybarlarında qatnasıw boyınsha ámeliy usınıslar berildi.
Ilajda qatnasıwshılar grant baǵdarlamalarınan qalay paydalanıw hám olardı nátiyjeli ámelge asırıw boyınsha ózleriniń sorawlarına juwaplar alıp, bul boyınsha zárúr bolǵan bilim hám kónlikpelerge iye boldı.
Adilbay Orazov,
Qaraqalpaqstan xabar agentligi sholıwshısı.