Соңғы ўақытлары Бердақ атындағы ҚМУ да сырт ел жоқары оқыў орынлары менен тәжирийбе алмасыў, оқытыўшылар ҳәм студент- жаслардың билимлерин жетилистириў бойынша кең көлемли жумыслар алып барылмақта.
Усы илажлардың даўамы ретинде Россия федерациясының М.В.Ломоносов атындағы Москва мәмлекетлик университетиниң Биогеография кафедрасы доценти, география илимлериниң кандидаты Бошарников Максим Викторович университетиниң «Экология ҳәм топырақтаныў» кафедрасында академиялық алмасыў оқыў бағдарламасы шеңберинде сапарда болып, биология факультетиниң профессор-оқытыўшылары ҳәм студент –жаслары менен ушырасты.
Ушырасыў кешесин факультет деканы, профессор Я.Аметов кирис сөз бенен ашып берди ҳәм өз сөзинде бундай ушырасыўлар, тәжирийбе алмасыўлар еки тәрепке де өз нәтийжесин беретуғынын атап өтти. Ушырасыўда оқытыўдың ең алдынғы методларынан пайдаланыў, функционал билимлерди арттырыў, өз-ара тәжирийбе алмасыў менен бирге еки тәрептиң тәбийий пәнлерди оқытыўдағы өзгешеликлери, оқыў бағдарламаларының уқсаслықлары ҳәм айырмашылықлары, биогеография пәнин оқытыўдағы жаңа методикалар ҳаққында кең түрде сөз етилди.
Сондай-ақ, мийманымыз Б. М. Викторович усы жылдың декабрь айының 2-сәнесинен 7-сәнесине шекем Экология ҳәм қоршаған орталықты қорғаў тәлим бағдары 1-курс студентлерине Биогеография пәнинен сабақ өтип, өз тәжирийбеси менен ортақласты. Ушырасыў соңында қатнасыўшылар өзлерин қызықтырған сораўларына жуўап алды.
Қарақалпақстан хабар агентлиги