Sońǵı waqıtları Berdaq atındaǵı QMU da sırt el joqarı oqıw orınları menen tájiriybe almasıw, oqıtıwshılar hám student- jaslardıń bilimlerin jetilistiriw boyınsha keń kólemli jumıslar alıp barılmaqta.
Usı ilajlardıń dawamı retinde Rossiya federaciyasınıń M.V.Lomonosov atındaǵı Moskva mámleketlik universitetiniń Biogeografiya kafedrası docenti, geografiya ilimleriniń kandidatı Bosharnikov Maksim Viktorovich universitetiniń «Еkologiya hám topıraqtanıw» kafedrasında akademiyalıq almasıw oqıw baǵdarlaması sheńberinde saparda bolıp, biologiya fakultetiniń professor-oqıtıwshıları hám student –jasları menen ushırastı.
Ushırasıw keshesin fakultet dekanı, professor Ya.Ametov kiris sóz benen ashıp berdi hám óz sózinde bunday ushırasıwlar, tájiriybe almasıwlar eki tárepke de óz nátiyjesin beretuǵının atap ótti. Ushırasıwda oqıtıwdıń eń aldınǵı metodlarınan paydalanıw, funkcional bilimlerdi arttırıw, óz-ara tájiriybe almasıw menen birge eki táreptiń tábiyiy pánlerdi oqıtıwdaǵı ózgeshelikleri, oqıw baǵdarlamalarınıń uqsaslıqları hám ayırmashılıqları, biogeografiya pánin oqıtıwdaǵı jańa metodikalar haqqında keń túrde sóz etildi.
Sonday-aq, miymanımız B. M. Viktorovich usı jıldıń dekabr ayınıń 2-sánesinen 7-sánesine shekem Еkologiya hám qorshaǵan ortalıqtı qorǵaw tálim baǵdarı 1-kurs studentlerine Biogeografiya páninen sabaq ótip, óz tájiriybesi menen ortaqlastı. Ushırasıw sońında qatnasıwshılar ózlerin qızıqtırǵan sorawlarına juwap aldı.
Qaraqalpaqstan xabar agentligi.