Усы жыл 5-декабрь күни Әжинияз атындағы Нөкис мәмлекетлик педагогикалық институтында шөлкемлестириў мәселелерине бағышланған мәжилис болып өтти.
Мәжилисти Өзбекстан Республикасы Жоқары билимлендириў, илим ҳәм инновациялар министри Қ.Шарипов басқарып барды.
Илажда соңғы жылларда елимизде жоқары билимлендириўди сапа жағынан жаңа басқышқа көтериў, заманагөй билим ҳәм көнликпелерге ийе болған, креатив пикирлейтуғын, мәлимлеме технологиялары ҳәм шет тиллерин терең меңгерген кадрларды таярлаў бағдарында әмелге асырылып атырған реформалар, олардың нәтийжелери, алдағы ўазыйпалар ҳаққында сөз болды.
Мәжилисте шөлкемлестириў мәселеси көрип шығылып, Өзбекстан Республикасы Министрлер Кабинетиниң тийисли буйрығы тийкарында Әжинияз атындағы Нөкис мәмлекетлик педагогикалық институты ректоры лаўазымына Қувондик Қадиров тайынланғанлығы атап өтилди.
Қ.Қадиров усы күнге шекем институттың жаслар мәселелери ҳәм руўхый-ағартыўшылық ислери бойынша биринши проректоры, сондай-ақ, институт ректоры ўазыйпасын ўақытша атқарыўшысы лаўазымларында жумыс ислеген.
Мәжилисте Өзбекстан Республикасы Жоқары билимлендириў, илим ҳәм инновациялар министрлигиниң буйрығы менен институттың оқыў ислери бойынша проректоры лаўазымына тайынланған Мухтар Ибрагимов жәмәәтке таныстырылды.
М.Ибрагимов мийнет жолы даўамында Қарақалпақ мәмлекетлик университетинде оқыў ислери бойынша проректор лаўазымында, сондай-ақ, 2019-2024-жылларда Өзбекстан Республикасы Олий Мажлиси Нызамшылық палатасының депутаты – Илим, билимлендириў, мәденият, спорт ҳәм жаслар мәселелери комитетиниң ағзасы сыпатында жумыс алып барған.
Мәжилисте бир қатар профессор-оқытыўшылар шығып сөйлеп, институт ректоры ҳәм оқыў ислери бойынша проректорына алдағы жумысларында табыслар тиледи.
Илажда халықаралық стандартларға сәйкес кадрлар таярлаў, халықаралық бирге ислесиўдиң нәтийжелилигин ҳәм билимлендириўдиң сапасын арттырыў, сондай-ақ, бакалавр тәлим бағдарларын тийисли тәртипте халықаралық аккредитациядан өткериў бойынша алдағы исленетуғын жумыслар белгилеп алынды.
Мәжилиске Қарақалпақстан Республикасы Жоқарғы Кеңесиниң комитет баслығы М.Атамуратов қатнасты.
Қарақалпақстан хабар агентлиги